Бәхил бул, Линарыбыҙ!

Мөкәй ауылы егете Линар Хәмитов мобилизацияның тәүге көндәренән үк махсус хәрби операцияға алына. Ул "Башҡорт" позвынойы аҫтында алғы һыҙыҡта дошман менән алыша. Линар ысынлап та, үҙ еренең ысын патриоты булды, ут эсендә йөрөгәндә лә, үҙ телендә шиғырҙар яҙҙы, йырҙар йырлап видеолар һалды.

"Даирә" гәзите ойошторған "Халҡым теле - хаҡлыҡ теле" конкурсына алғы һыҙыҡтан "Башҡорт балаһы мин" тип аталған туған тел тураһында шиғыр һөйләгән видеоһын ебәреп, 1-се урынға лайыҡ булды. Тик ҡыҙғанысҡа ҡаршы, Линар менән ялға ҡайтҡан сағында күрешергә насип булманы.

Күптән түгел батыр яугиребеҙҙең үҙенең күңеленән урғылып сыҡҡан көслө шиғырын төркөмөбөҙҙә лә баҫтырған инек. Был шиғыр уның һуңғы ижад емеше булыр, тип кем уйлаған. Тағы күпме йырланмаған йырҙары, яҙылмаған шиғырҙары ҡалды. 

Линар Хәмитовтың атай-әсәһенең, туғандарының, яҡындарының ауыр ҡайғыһын уртаҡлашабыҙ. Тыныс йоҡла, батырыбыҙ. 

Линар менән хушлашыу митингы 28 сентябрҙә 13.00 сәғәттә Мөкәй ауылының Еңеү паркында буласаҡ. 

Минең тәндә бүре йәшәй,
Һәм тамырҙарымда ҡаны.
Ҡыҙа ул ҡан, күҙҙе ҡаплай,
Тағы шашһа дошмандарым.
Һеҙ, меҫкендәр, ике йөҙлө
Ҡурҡаҡ шайтан ҡолдары.
Эй, дошмандар янап әйтәм,
Көтә һеҙҙе башҡорт улдары.
Башҡорт - тыныс, ләкин ҡыҙыу -
Теймәҫ ул һис бер кемгә.
Беренсе булып ҡорал тотоп,
Һуғыш менән аяҡ баҫмаҫ сит ергә.
Борондан ҡанлы һуғыш,
Үлем килһә күршеләргә.
Бүре тоҡомо йоҙроҡ булып,
Берҙәм яуға күтәрелә.

Бәхил ул, Линар! Ятҡан урының тыныс, йәнең йәннәттә, иманың юлдаш булһын!