Үтәгәндә тағы байрам гөрләне

Урындағы халыҡ үҫтергән ҡабаҡтар байрамдың төп тамашаһы булды. Ҙур булып үҫкән йәшелсә ғорурлыҡ  ҡына түгел, ә ауыл халҡының мул уңышы һәм эшһөйәрлеге тураһында һөйләй. Ҡабаҡтан әҙерләнгән төрлө-төрлө аш-һыуҙан өҫтәлдәр һығылып торҙо.

Үтәгән халҡын ҡотларға килгән артистарҙың сағыу сығыштары күңел асыу һәм шатлыҡ атмосфераһын тулыландырҙы. Концерт программаһы өлкәндәрҙе лә, балаларҙы ла йыйҙы, барыһы ла рәхәтләнеп ҡушылып йырланы һәм бейене. Райондың спор комитеты уҡтан атыу, арҡан тартыу, гер күтәреү буйынса ярыштар ойошторҙо. Унда ауыл биләмәләре, райондар командалары ҡатнашты. Еңеүселәргә бүләктәр тапшырылды.

«Үтәгән уйындары» байрамы ауыл өсөн йолаларҙың һәм берҙәмлектең ни тиклем мөһим булыуын тағы бер тапҡыр иҫбатланы. Бындай ваҡиғалар кешеләрҙе берләштерә, мәҙәни мираҫты һаҡлап ҡалырға мөмкинлек бирә һәм бөтәһенә лә яҡшы кәйеф бүләк итә.

Гөлсәсәк Аласова.