Республика Башлығы - беҙҙең районда

Республика Башлығы - беҙҙең районда

Республика программаһына индерергә ҡушты

БР Башлығы был көндө Ауырғазы күп профилле колледжының Ҡырмыҫҡалы филиалының уҡыу корпусын, 100 кешегә иҫәпләнгән ятаҡты ҡараны һәм педагогик коллектив менән аралашты. Филиал мө­дире Нуриман Ульябаев уҡыу бинаһының – 1950, ә ятаҡтың 1972 йылда төҙөлөүе һәм уларға кисекмәҫтән капиталь ремонт та­лап ителеүе хаҡында Радий Фәрит улына еткерҙе. Уҡытыусылар иһә уҡыу йортона үҙ аллы учреждение статусын кире ҡайта­рыуҙы һораны. Радий Хәбиров Ауырғазы күп профилле колледжының Ҡырмыҫҡа­лылағы филиалын 2026 йылға урта һөнәри белем биреүсе уҡыу йорттарын модерниза­циялау буйынса республика программаһы­на индерергә ҡушты һәм:

- Тракторҙарҙа эшләйәсәк, станок арты­на баҫасаҡ егеттәребеҙгә тейешле шарттар булдырмау ғәҙел түгел. Бында эре “Уңыш” йәмғиәте эшләй. Уның етәкселеген уҡыу йортона техника менән ярҙам итергә саҡы­рам, - тине.

Колледж уҡытыусыларының уҡыу йор­тона айырым статус кәрәклеге хаҡындағы үтенесен дә хупланы һәм Ҡырмыҫҡа­лы районының ауыл хужалығы буйынса уңышлы эшләгән ҙур төбәк булыуын бил­дәләне.

- Бөгөн Ҡырмыҫҡалы районында эшләйем. Республика буйлап эш сәфәре ваҡытында һәр ваҡыт колледждарҙы ҡарап сығырға тырышам. Улар йәштәргә кәрәк. Яҡшы хеҙмәт хаҡы булған эш табыу һәм карьера төҙөү өсөн шәп һөнәр алырға була бында. Һуңғы ике көн эсендә Малаяҙҙағы Дыуан күп профилле колледжы һәм Ҡыр­мыҫҡалылағы Ауырғазы күп профилле кол­леджы филиалдарында булдым. Уларҙың икеһенә лә ремонт талап ителә. Шуға күрә 2026 йылда икеһенең дә матди һәм уҡыу ба­заларын тәртипкә килтерергә ҡарар иттек, - тип яҙҙы үҙенең социаль селтәрендәге сә­хифәһендә Радий Хәбиров.

Яугир ғаиләләре менән осрашты

Радий Хәбиров эш сәфәре ваҡытын­да махсус хәрби операцияла һәләк булған яугирҙәрҙең ғаиләләре менән осрашыуға ла ваҡыт бүлде. Максим Багавеев, Алек­сей Михайлов, Айрат Ғилемшин, Тимур Фәйзуллин, Максим Князев, Андрей Трофимовтарҙың ата-әсәләре менән улар киләсәк тормош, мөмкинлектәр һәм ярҙам саралары хаҡында һөйләштеләр. Төбәк етәксеһе һәр береһенең ауыр юғалтыу ҡай­ғыһын уртаҡлашты һәм уларға яугирҙәр хәрби бурыстарын үтәгән саҡта күрһәткән ҡаһарманлыҡтары өсөн һәләк булғандан һуң наградланған генерал Шайморатов ор­дендарын тапшырҙы.

 - Һеҙҙең балалар – Тыуған ил алдын­дағы бурыстарын намыҫлы үтәгән ысын геройҙар. Беҙ барыбыҙ ҙа улар менән ғо­рурланабыҙ һәм һеҙҙең менән бергә ҡай­ғырабыҙ. Беҙҙең төп бурыс – Ватан өсөн ғүмерҙәрен биргән хәрбиҙәрҙе һәр ваҡыт иҫтә тотоу, уларҙың ғаиләләренә иғтибар бүлеү һәм хәстәрләү. Яугирҙәргә ярҙам итеү эше минең шәхси контролдә, -тине Радий Фәрит улы осрашыу ваҡытында.

Ата-әсәләр үҙ сиратында оло иғтиба­ры өсөн уға рәхмәт әйттеләр.

-Бындай иғтибар һәм ярҙам беҙҙең өсөн бик мөһим. Һәр саҡ беҙҙең менән бәйләнештә булған, һәр бер проблема­быҙҙы хәл иткән район хакимиәтенә лә рәхмәтлебеҙ. Үҙебеҙ ҙә ситтә ҡалмайбыҙ, маскировка селтәрҙәре үрәбеҙ, Тыуған илебеҙ һағында торғандарға ҡулыбыҙҙан килгәнсе ярҙам итергә тырышабыҙ, -ти­неләр осрашыуҙа ҡатнашыусылар.

Радий Фәрит улы ирекмәнлек эштәре өсөн барыһына ла рәхмәт әйтеп, “Сала­уат Юлаев” хоккей клубының уйынын бергә ҡарарға саҡырҙы.

Балалар поликлиникаһына сәйәхәт ҡылды

Республика етәксеһе район дауаха­наһы эргәһендә былтыр “Һаулыҡ һаҡлау” милли проектына ярашлы асылған бала­лар поликлиникаһына сәйәхәт ҡылды. Яңы медицина учреждениеһы сменаһы­на 600 кешене ҡабул итеүгә иҫәпләнгән. Бында 10 меңдән ашыу бала тейешле медицина ярҙамы ала. Уларҙы участка педиатрҙары, балалар хирургы, стома­тологтар, эндоскопист, офтальмолог, оториноларинголог, акушер-гинеколог, шулай уҡ функциональ диагностика та­биптары ҡабул итә. Был дауалау учрежде­ниеһы проектын тормошҡа ашырыу 680 млн һумға төшһә, шуның 240 млн һумы­на заманса медицина ҡорамалдары һа­тып алына. Эшләү өсөн уңайлы шарттар тыуҙырыуға һәм заманса медицина ҡо­рамалдары алыуға ярҙам иткәне өсөн ба­лалар поликлиникаһы табиптары Радий Фәрит улына рәхмәт әйтте. Үҙ сиратын­да республика етәксеһе йәш белгестәрҙе йәлеп итеү буйынса әүҙем эшләгән район хакимиәттәре башлыҡтарының урындағы медицина учреждениеларын профессиональ кадрҙар менән уңышлы тулыландырыуын, ошо юҫыҡтағы төрлө дәртләндереү сараларының һөҙөмтәле булыуын һыҙыҡ өҫтөнә алды.

Төҙөлөш барышы менән танышты

Радий Хәбиров районда төҙөлә башлаған республикабыҙҙағы иң эре элеватор төҙөү проектын бойомға ашы­рыу барышын ҡараны.

“Уңыш” ауыл хужалығы предпри­ятиеһының селекция-орлоҡсолоҡ үҙә­гендәге ҡоролмала 120 мең тонна ашлыҡ һаҡларға мөмкин буласаҡ. Агропредпри­ятие етәксеһе Радик Рафиҡов бүленгән майҙансыҡта орлоҡто ҡабул итеү, таҙар­тыу, киптереү һәм һаҡлау пунктының нигеҙе һалыныуы, унда конструкция­ларҙы һәм ҡороу эштәренең башланыуы хаҡында бәйән итте.

“Хәтер баҡсаһы” акцияһында ҡатнашты

“Экология именлеге” милли проек­тының “Урмандарҙы һаҡлау” федераль проектына ярашлы йыл да ағас ултыртыу буйынса өмәләр уҙа. Быйылғы “Хәтер баҡсаһы” акцияһы Бөйөк Еңеүҙең 80 йыллығына һәм Ватанды һаҡлаусылар йылына арналды.

-Башҡортостан Республикаһы халҡы йыл һайын “Хәтер баҡсаһы” акцияһын­да әүҙем ҡатнаша. Быйылғы йылда беҙ ике миллионлап ағас ултыртырға план­лаштырабыҙ. Был акция Бөйөк Ватан һуғышы йылдарында һәләк булған 27 миллиондан ашыу совет граждандарын хөрмәтләп иҫкә алыу сараһы булараҡ ойошторолдо. Шуға ла Рәсәй Федераци­яһы биләмәһендә йыл һайын 27 милли­он тирәһе ағас ултыртыла. Белеүегеҙсә, Ҡырмыҫҡалы урманлы район түгел, әммә район хакимиәте ярҙамы менән йыл да районда йәшелләндереү эштәре башҡарыла һәм урман фондын тулы­ландырыуға ҙур өлөш индерелә, -тине сарала ҡатнашыусы урман хужалығы министры Марат Шәрәфетдинов үҙе­нең сығышында һәм батырҙарса һәләк булған яугирҙәрҙе бер минутлыҡ тынлыҡ менән иҫкә алырға тәҡдим итте.

Ҡырмыҫҡалы ауылының Патриот паркы биләмәһендә был көндө 400 йүкә һәм 100 ҡарағай ағастарынан Бөйөк Ва­тан һуғышы геройҙары иҫтәлегенә аллея һалынды.

– Ағас ултыртыу менән бәйле бар нәмә – яҡты эш. Был эш менән бер һүҙһеҙ шөғөлләнергә кәрәк. Уны тарихи ваҡиғаларға бәйләү менән акция айы­рыуса әһәмиәтлерәк була бара. Тыуған илде яҡлап һәләк булған һәм бөгөн дә уны яҡлауҙарын дауам иткән йәштәргә хөрмәт һәм ихтирам билдәһе ул. Урман фондын тулыландырыуҙы тәьмин итеү – шулай уҡ мөһим бурыс. Шуға күрә беҙ йыл һайын ҡырҡҡанға ҡарағанда 5-10 процентҡа күберәк ағас ултырта­быҙ. Мәҫәлән, Ҡырмыҫҡалыла бынан бер нисә йыл элек нигеҙ һалынған тотош аллея ҡалҡып сыҡты, -тип билдәләне “Хәтер баҡсаһы” акцияһының әһәмиә­тен Радий Хәбиров журналистар менән әңгәмә барышында.