Республиканың IT-компаниялары аккредитацияһын раҫлай ала

Мәғлүмәт технологиялары өлкәһендә эшләгән, аккредитацияланған компаниялар йыл һайын Дәүләт хеҙмәттәре аша ғариза биреп, үҙҙәренең статусын раҫларға тейеш, тип хәбәр итә республика Хөкүмәтенең матбуғат хеҙмәте. Быйыл был мөмкинлек 7 майҙан 1 июнгә тиклем асыла. IT-тармаҡҡа ярҙам “Мәғлүмәт иҡтисады һәм дәүләтте һанлы трансформациялау” милли проекты (национальный проект “Экономика данных и цифровая трансформация государства”) ҡатнашлығында тормошҡа ашырыла.

– Шуны билдәләп үтергә кәрәк: аккредитация бик күп өҫтөнлөктәр бирә, шулай уҡ инвесторҙарҙы ҡыҙыҡһындырырға ярҙам итә, – тип аңлатма бирә БР-ҙың дәүләткә идара итеүҙең һанлы үҫеш министры Геннадий Разумикин. – IТ-компаниялар мотлаҡ аккредитация алырға тейеш.

Ғаризала мәғлүмәт технологиялары өлкәһендәге эшмәкәрлектән килгән килемдең өлөшө тураһында, ойошманың рәсми сайтына һылтанма һәм башҡа мәғлүмәттәр булырға тейеш.  

Башҡортостандың аккредитацияланған IT-компаниялары өсөн республика дәүләт хеҙмәттәре порталында «Башҡортостан Республикаһының стартаптар реестры» булдырылған. Уның ярҙамында ошо предприятиеларҙың етәкселәре Реестрға индереү тураһында белешмә ала, һуңынан уны Рәсәйҙең Һанлы үҫеш министрлығына ебәрә. Был IT-компанияны ябайлаштырылған тәртиптә аккредитациялау мөмкинлеген бирә.

«Мәғлүмәт иҡтисады һәм дәүләттең һанлы трансформацияһы» милли проекты — Рәсәй Федерацияһы Президенты Владимир Путин ҡарары менән 2025–2030 йылдарҙа Рәсәйҙә тормошҡа ашырыла торған 19 милли проекттың береһе.

Сығанаҡ: it.bashkortostan.ru/presscenter/news/716897/