Балалар матур йолалар менән танышты

Учалы районының Үҙәк район моделле китапханаһы халыҡ оҫтаһы Нәғим Аллаяров менән “Йолаларҙың тере ебе” тип аталған осрашыу ойошторҙо. Сара "Мәҙәниәт" милли проектының “Урын генийы” проекты сиктәрендә уҙҙы. Унда Учалы ауылының башҡорт гимназияһы уҡыусылары ҡатнашты. Бындай осрашыуҙар башҡорт халҡының милли традицияларына һәм рухи ҡиммәттәренә ҡыҙыҡһыныу уятыуға йүнәлтелгән.

Нәғим Аллаяров 44 йыл Юлдаш ауылының Мәҙәниәт йортонда эшләй, “Юлдаш” халыҡ театры һәм өлгөлө балалар театры етәксеһе. Ул бейей, йырлай, музыка ҡоралдарында уйнай, үҙенең театры өсөн сценарийҙар яҙа. Шулай уҡ ул халыҡ художество кәсептәре оҫтаһы булараҡ та үҙен күрһәтте. Уға һәм уның ағаларына ауылда билдәле балта оҫтаһы булған атаһы ҙур йоғонто яһаған. Ул һәләтен улдарына тапшыра.

Нәғим Аллаяров һандыҡ әҙерләү материалдары һәм технологиялары, инструменттар һәм ҡулайламалар тураһында һөйләне. Балалар оҫтаның сығышын ҡыҙыҡһынып тыңланы, уның эштәрен ҡараны.

“Тәбиғи ағастан ижад итеү бик оҡшай, сөнки уның үҙенең еҫе һәм текстураһы бар. Урам буйлап барғанда тәҙрә йөҙлөгөнә ҡарарға яратам. Улар һәр йорттоң биҙәге булып тора. Үкенескә күрә, һырлы йөҙлөк, халыҡ архитектураһы элементы булараҡ, тарихҡа инеп ҡала. Шуға күрә, ағас мираҫтың тергеҙелеүе һәм киләсәк быуындар өсөн һаҡланып ҡалыуы бик мөһим. Ауылдаштарымдың йорттарында минең ҡулдарым менән яһалған яңы семәр йөҙлөктәр күренһә, мин уларға ҡарағанда нығыраҡ шатланам. Улар миңә артабанғы ижад өсөн яңы дәрт бирә”, – тип һөйләй оҫта.

Алып барыусы уҡыусыларҙы башҡорт халҡының көнкүреше, туй йолалары һәм һандыҡҡа бәйле һатыу йолалары, биҙәктәр менән таныштырҙы. Сарала ҡатнашыусыларға башҡорттарҙың “килен төшөрөү” йолаһы булыуы, унда һис шикһеҙ кейәүҙең өйөнә кәләш бирнәһе менән биҙәкле һандыҡ килтереүе ҡыҙыҡлы булды.

Билдәле булыуынса, “Мәҙәниәт” (национальный проект “Культура”) милли проекты Рәсәй Президенты Владимир Путиндың май указы менән булдырылды.

Фото: Учалы районы хакимиәте.