Улар бөгөн дә сафта

28 май - Сик һаҡсылары көнө

Улар бөгөн дә сафта

Сик һаҡсылары көнө алдынан Иҫке Бәпес ауылынан бер туған Венер һәм Линур Ҡолоҡаевтар менән осраштым.

 Элекке сик һаҡсылары булмай, тиҙәр. Улар илде ҡайҙа һаҡлаһа ла, һәр ваҡыт үҙ асылында ҡала. Мәҡәләм ге­ройҙары ла ана шундайҙарҙан.

Венер Афған менән сиктәш Тад­жиҡстанда 1984-1986 йылдарҙа хеҙмәт итһә, Линур 1988-1990 йылдарҙа Ҡы­тайға яҡын Алыҫ Көнсығыш сигендә илде һаҡлаған. Икеһе лә ефрейтор зва­ниеһында уҡсы булып хеҙмәт иткән.

Ҡолоҡаевтар күп балалы ябай кол­хозсы ғаиләһендә тыуып үҫәләр. Ата­лары - Әнүр ағай механизатор, әсәләре Сания апай сөгөлдөрсө була. Улар ба­лаларын эшһөйәр, илһөйәр итеп тәр­биәләйҙәр. Мәктәп йылдарынан уҡ ағалы-ҡустылы бер туғандар армияға барыу, сик буйында хеҙмәт итеү ту­раһында хыяллана. Шулай ҙа элиталы ғәскәрҙәргә теләһә кемде түгел, көслө рухлы, физик әҙерлекле егеттәрҙе генә алалар. Уларҙың психологияһын, стре­старға бирешмәүҙәрен, туғандарын тикшерәләр. Ҡолоҡаевтар һынауҙарҙы лайыҡлы үтеп, был ғәскәргә эләгәләр.

- Илде һаҡларға ышанып тапшы­рылғас, уны намыҫ менән үтәргә кәрәк ине. Мин хеҙмәт иткән саҡта Афған­стандан диверсанттар сикте йыш боҙорға тырыша ине. Уларҙы беҙ күп тапҡырҙар тоттоҡ, - тине Венер Әнүр улы.

- Ғаиләлә алты бала – биш малай һәм бер ҡыҙ үҫтек. Венер ағайым менән минең йәш айырмабыҙ - биш йәш. Ул баш бала булһа, мин өсөнсөмөн. Уның өлгөһөндә сик буйында хеҙмәт итер­гә теләнем һәм ғариза яҙҙым. Илдең сиген һаҡлау бик яуаплы, ҡатмарлы булһа ла, күңелемде биреп, ғорурлыҡ хисе менән хеҙмәт иттем. Әйткәндәй, беҙҙең ғаиләнән дүртебеҙ армия са­фында булды, - тип һүҙгә ҡушылды Линур Әнүр улы.

Ҡолоҡаевтарҙың икеһе лә ауыл­да өлгөлө ғаиләләрҙән һанала. Венер Әнүр улы ҡатыны Фәнзилә Риф ҡыҙы менән ике малай үҫтерһә (ҡыҙғанысҡа, улдары Рамазан вафат булған), Линур Әнүр улы ла ҡатыны Гүзәл Рәжәп ҡыҙы менән ике малай тәрбиәләй. Әйткәндәй, Венер Әнүр улының медбрат булған улы Рәмил махсус хәрби опера­ция зонаһында яралы һалдаттарҙы дау­алай, әлеге көндә Ростов госпиталендә хеҙмәт итә.

Армияны ҡалдырыуҙарына байтаҡ йылдар уҙһа ла, элекке сик һаҡсылары был йылдарҙы йылылыҡ һәм ғорур­лыҡ хистәре менән телгә ала, “һал­дат хеҙмәте”, “дуҫлыҡ” тигән төшөн­сәләрҙе ҡәҙерләп һаҡлай. Улар әлеге көндә лә әүҙемдәр, ауыл биләмәһендә һәм районда үткәрелгән төрлө сара­ларҙа ҡатнашып, патриотик эштәр алып баралар. Тирә-яҡ райондар акти­вистары менән дә мөғәмәләлә булып, аралашып-ярҙамлашып торалар, сик буйы ғәскәрҙәренә һәйкәлдәр асыуҙа теләп ҡатнашалар.

“Илебеҙ сиге һәр ваҡыт йоҙаҡта булһын. Яуыз уйлылар унда үтә ал­маһын. Донъялар имен булһын”, - тип оҙатып ҡалды ағалы-ҡустылы Ҡолоҡа­евтар.

Фәниә СӘЛИМГӘРӘЕВА.

Автор фотоһы.