Журналистар махсус хәрби операцияла ҡатнашыусыларға ярҙам итә

Төбәк киң мәғлүмәт саралары вәкилдәре халыҡҡа яугирҙәребеҙҙең батырлығы тураһында даими мәғлүмәт биреп кенә ҡалмай, хәрби хәбәрселәр сифатында алғы һыҙыҡҡа бара һәм МХО зонаһында ҡулдарына ҡорал тотоп дошманға ҡаршы һуғыша. Әммә хәрби махсус операцияла ҡатнашыусыларға ярҙам күрһәтеүҙә лә әүҙем ҡатнашалар: маскировка селтәрҙәре үрәләр, гуманитар ярҙам йыялар, тип хәбәр итә Республика мәғлүмәт үҙәге директоры Айнур Дәүләтбәков социаль селтәрҙәге сәхифәһендә.

«Башҡаса мөмкин дә түгел, сөнки бөтәһе лә фронттың ныҡлы һәм ышаныслы тылдан тыш йәшәй алмауын яҡшы аңлай. Мәҫәлән, «Йәшлек» республика йәштәр гәзите редакцияһы коллективы алдынғы хәрби округта булған яугирҙәребеҙгә яңы автомобиль һатып алыу өсөн аҡса йыйыу ойошторҙо. Акцияға Республика мәғлүмәт үҙәге - «Башҡортостан Республикаһы» нәшриәт йорто филиалы хеҙмәткәрҙәре, «Йәшлек» гәзитенә яҙылыусылар һәм уны уҡыусылар, шулай уҡ бағыусылар ҙа ҡушылды. Беҙ ҡыҫҡа ғына ваҡыт эсендә кәрәкле сумманы йыйҙыҡ, акцияны ойоштороусылар «УАЗ» машинаһын һатып алды.

11 майҙа Матбуғат йорто алдында "УАЗ"ды юлға оҙаттылар. Рәсәй мәғлүмәт үҙәге хеҙмәткәрҙәре журналистарға бүләк әҙерләне: бензогенератор һатып алды, уның өсөн «Тамаша» һәм «Һәнәк» журналдарының баш мөхәррирҙәре Илшат Зарипов менән Илгиз Ишбулатовҡа рәхмәт белдерәм. Домкрат, компрессор һатып алынды, Шакша биҫтәһенең «Беҙҙекеләр өсөн» ирекмәндәр штабы иһә маскировка селтәре бирҙе», - тип һөйләй яҙма авторы.

Айнур Дәүләтбәков һүҙҙәренсә, машина артынан МХО зонаһынан Өфөгә «Сиған» позывнойлы һалдат махсус рәүештә килгән.

Үҙ сиратында, «Республика Башкортостан» гәзите коллективы «Беҙ үҙебеҙҙекеләр яҡлы» ирекмәндәр төркөмөнән үҙенең дуҫтарына редакцияла үрелгән икенсе маскировка селтәрен тапшырҙы. Апрель аҙағында бында селтәр үреү өсөн махсус өҫтәл ҡуйылғайны. Бөгөн гәзиттең һәр хеҙмәткәре тиерлек был оҫталыҡҡа эйә. Буш ваҡыты булғандар, килеп, таҫмаға «биҙәк»тәр үреп китә. Кисен эштән һуң да таралырға ашыҡмайҙар. Сөнки был шөғөл - ысынлап та, кәрәкле эш, уның һөҙөмтәһендә яугирҙәрҙең ғүмере ҡотҡарыла.

Сығанаҡ: https://resbash.ru/news/obshchestvo/2024-05-12/v-bashkirii-zhurnalisty-pomogayut-uchastnikam-svo-3762245