Иңдәренә ҙур яуаплылыҡ йөкмәтелгән

Йыл һайын октябрҙең һуңғы йәкшәмбеһендә Рәсәйҙә Автомобилселәр көнө билдәләнә. Бөгөнгө тормошто автомобилһеҙ күҙ алдына килтереүе ҡыйын. Ҡырмыҫҡалы ауылында йәшәгән, ғүмеренең 40 йылын водитель һөнәренә арнаған Самат Әминев та үҙ иңенә юл хәүефһеҙлеге, кешеләрҙең именлеге өсөн ҙур яуаплылыҡ йөкмәтелеүен яҡшы аңлай.

 Ҡарлыман ауылында тыуып үҫеп, ошонда уҡ урта мәктәпте тамамлаған йәш егет киләсәк тормошон водитель һөнәренә бағышларға ҡарар итә.

- Бала саҡта машина йөрөткән оло ағайҙарға күҙебеҙ ҡыҙып ҡарай торғай­ныҡ. Шуғалыр инде класыбыҙҙағы биш егет бергә, бөтәбеҙ ҙә водитель бу­лабыҙ, тип һүҙ бирҙек һәм мәктәпте та­мамлау менән күмәкләшеп Ляхов учи­лищеһына уҡырға индек, - ти Самат Салауат улы һөнәр һайлауы хаҡында.

Водитель таныҡлығын алғас, ул “Салауат” колхозына һөнәре буйын­са эшкә урынлаша. Хәрби хеҙмәткә барғас та, ярайһы уҡ тәжрибә тупларға өлгөргән егеткә “Урал” машинаһын ышанып тапшыралар. Әрменән ҡайтҡас, колхоздағы эшен дауам итә.

Самат Салауат улы бына ун биш йыл инде Ҡырмыҫҡалының балалар консультацияһында водитель булып эшләй. Намыҫлы хеҙмәте Маҡтау хат­тары менән билдәләнгән.

- Шөкөр, водитель булып эшләү дәүерендә бер ниндәй ҙә юл-транспорт ваҡиғаларына тарыманым, авария­лар эшләмәнем. Ҡайҙа кәрәк, шунда ваҡытында алып барып еткерәм, ми­нең яҡтан бер ҡасан да тотҡарлыҡ бул­маны. Иң мөһиме – юлда бер ҡасан ашығырға ярамай. Быны мин һәр саҡ хәтеремдә тотам һәм мотлаҡ үтәйем. Кәрәк урынға ваҡытында барып етер, шәп йөрөмәҫ өсөн алданыраҡ сығырға кәрәк. Алыҫ юлға запас ваҡыт менән сыҡһаң, тәғәйен ереңә ваҡытында һәм ашыҡмай ғына барып етәһең. Авто­мобилде даими рәүештә ҡарап-бағып, төҙөк тотоу мотлаҡ. Шул саҡта юлда боҙолоп ултырмайһың. Һаҡланғанды һаҡлармын, тигәндәй, йәйәүле лә, во­дитель дә һәр саҡ иғтибарлы булһын. Бигерәк тә йәштәр дыуамал йөрөй. Ҡапыл ҡаршыға бала-саға килеп сығы­уы бар, юлда машиналар ҙа күп, за­кондар ҙа ҡаты хәҙер. Профессиональ водителдәр, автоһәүәҫкәрҙәр үҙен генә ҡайғыртмай, дөйөм хәүефһеҙлек тураһында ла уйланһын ине. Күп юл фажиғәләре эскән килеш руль артына ултырғандар арҡаһында килеп сыға. Шуны ла онотмаһындар рулдәгеләр, - тигән кәңәштәрен еткерә тәжрибәле водитель.

Самат Салауат улы тормош иптә­ше Гөлнур Юныс ҡыҙы менән бер ҡыҙ тәрбиәләп үҫтергәндәр. Әлеге көндә улар ике ейәнсәргә олатай-өләсәй бу­лыу бәхетен кисерә.

Нисек кенә ауыр һәм яуаплы бул­маһын, үҙ эшен яратып башҡара ул. Һөнәри байрамдары менән ҡотлап, Самат Салауат улына һәм иңдәренә хәүефһеҙлек өсөн ҙур яуаплылыҡ алған барлыҡ водителдәргә имен-аман юл­дар теләйбеҙ.

Розалия НАЗАРОВА.

Автор фотоһы.