«Даирә»не көтөп ала

«Даирә»не көтөп ала

Бала саҡтан эш күреп үҫергә, йәшләй генә кол­хозда ла, үҙенең белеме буй­ынса сауҙа өлкәһендә лә тир түгергә тура килә уға. Оҙаҡ йылдар почта начальнигы булып эшләп хаҡлы ялға сыҡҡан.

Фәимә Бүләк ҡыҙы – гә­зитебеҙҙең тоғро уҡыусыһы. Үҙ туған телендә сыҡҡан берҙән-бер район гәзитен алдырмайынса ҡалғаны юҡ.

- Бәләкәйҙән уҡырға яраттым, әле лә гәзит-жур­налдарҙан өҙөлмәйем, китапхананан китаптар ҙа алып уҡыйым. Бигерәк тә, үҙебеҙҙең район яңылыҡтарын сағылдырған, райондаштарымдың уңыштарын барлаған, күркәм ғаиләләрҙе данлаған “Даирә”не көтөп алам. Бына тәүгә бүләк оттом. Яңы йылдың ошолай уңыш­лы башланып киткәне өсөн сикһеҙ ҡыуандым. Ейәнсәрҙәремә яҡшы бүләк булды, - тигән тәьҫораттары менән бүлеште бүләк отоусыбыҙ.

Насировтар ғаиләһе өс ул тәрбиәләп үҫтергәндәр. Иң олоһо йыл ярым элек Рәсәй Федерацияһы Оборона министрлығы менән килешеү төҙөп, бө­гөнгө көнгәсә махсус хәрби операция биләмәһендә хеҙмәт итә.

- Тиҙерәк һуғыш бөтһөн, илебеҙгә тыныслыҡ килһен. Бар теләгем шул. Бүләктәрегеҙ менән ҡыуандырғанығыҙ өсөн һеҙгә оло рәхмәт. Эшегеҙҙә ижади уңыштар, ғаиләләрегеҙгә именлек, барығыҙға ла ныҡлы сәләмәтлек теләйем, - тигән теләктәрен белдерҙе Фәимә апай.

Изге теләктәрегеҙ, беҙҙең менән бергә булғанығыҙ өсөн үҙегеҙгә лә ҙур рәхмәт! Улын яу яланына оҙатҡан әсә йөрәгенең ниҙәр кисергәнен аңлай­быҙ. Һуғыш тиҙерәк бөтөп, Фәимә апайға һәм шулай уҡ барлыҡ башҡа әсәләргә иҫәнлектә-һаулыҡта улдары менән яҡын арала осрашырға яҙһын тигән теләктәр юллайбыҙ.