90 йылдан артыҡ тарихы булған баҫмала районда булған ваҡиғалар халыҡҡа ваҡытында еткерелә. Бының өсөн гәзит редакцияһында эшләүселәр бик күп көс һала. Уларҙың береһе Зөләйха Узакова байтаҡ йылдар верстка бүлегендә хеҙмәт итте. Бындағы эште ул биш бармағы кеүек белә.
Тыумышы менән ул Үзбәкстандың Бохара ҡалаһынан. 1960 йылда әсәһенең тыуған яғына – Башҡортостанға ҡайтырға ҡарар итәләр һәм Ҡырмыҫҡалыла төпләнәләр. Бала саҡтан йыр-моңға әүәҫ, районда үткәрелгән төрлө сараларҙа әүҙем ҡатнашҡан Зөләйханы райондың мәҙәниәт бүлегенә эшкә саҡыралар. Ҡырмыҫҡалыла ғына түгел, республика ауыл һәм ҡалаларында, хатта Ырымбур өлкәһенә лә барып концерт номерҙары менән сығыш яһайҙар, театрҙар ҡуйып йөрөйҙәр. Күп тапҡыр лауреат исеменә лайыҡ булалар. Байтаҡ йылдар мәҙәниәт бүлеге директоры кеүек яуаплы вазифа башҡарырға ла тура килә уға. Шулай итеп, 23 йыл ғүмерен мәҙәниәт өлкәһенә бағышлай.
Бергә театрҙар ҡуйып йөрөгән район гәзите редакцияһы мөхәррире Миҙхәт Рәжәпов 1994 йылда уны урындағы радиоға тапшырыуҙар алып барырға диктор итеп эшкә саҡыра. Бер нисә йыл унда эшләгәс, төрлө сәбәптәр буйынса радио ябыла һәм Зөләйха Чулли ҡыҙы редакцияның башҡорт телендә нәшер ителеүсе бүлегенә эшкә күсә. Әхәт Юлмөхәмәтов, Зифа Йәрмөхәмәтова, Сайма Рәхимова менән бер бүлектә эшләйҙәр. Редакцияға компьютерҙар ҡайтарылғас, башҡорт телендә заманса техниканы үҙләштерергә тура килә. Тәүҙә башҡорт телендәге текстарҙы йыйһа, һуңынан татар бүлегенә верстка буйынса инженер итеп күсерәләр.
Үткән быуат аҙағында район баҫмаһы гәзит уҡыусылар араһында хаҡлы рәүештә абруй менән файҙалана. Айырыуса ауыл ерендә йәшәүселәрҙең барыһы ла тиерлек район баҫмаһын алдыра. Һәр ауылда гәзиткә мәҡәләләр ебәреп тороусы ауыл хәбәрселәре барлыҡҡа килә. Улар үҙ коллективтарының уңыштары һәм етешһеҙлекләр тураһында ҙур теләк менән сығыш яһаны һәм гәзитте уҡымлы итеү өсөн үҙ фекерҙәрен белдерҙе. Ҡыҫҡаһы, уларҙың һәр береһе гәзитте эстәлекле итеү теләге менән янды. Тәнҡит мәҡәләләренә лә һәр саҡ урын бирелде, етешһеҙлектәр тикшерелде һәм тейешле саралар күрелде. Һәм, әйтергә кәрәк, проблемалар һәр сак тиерлек ыңғай хәл ителде. Шуның йоғонтоһо арҡаһында гәзиттең абруйы ла артты. Бигерәк тә ауыл хужалығы, етештереү тармағында эшләүселәр тураһындағы яҙмаларҙы халыҡ яратып ҡабул итте. Ауыл хәбәрселәренең әүҙемлеген һәм шул уҡ ваҡытта абруйын арттырыу маҡсатында йылына бер тапҡыр иң әүҙем хәбәрселәрҙе саҡырып, тантаналы шарттарҙа йыйылыштар үткәрелә һәм уларға бүләктәр тапшырыла.
- Оҙаҡ йылдар бергә эшләгән хеҙмәттәштәрем – гәзит мөхәррире Миҙхәт Рәжәпов, дубляж бүлеге мөдире Эльза Саттарова, текстар йыйыу буйынса оператор Рәшиҙә Хәбибуллина, тәржемәсе Ләйлә Бакирова, корректорҙар Ғәлиә Сәлимова, Фариҡа Мөхәмәтғәлина һәм башҡалар менән ҡулға-ҡул тотоношоп тигәндәй эшләнек. Һуңынан бүлеккә Венера Ғафарова, Гөлназ Хисамова, Эльвира Ямалетдинова, Гөлсәсәк Йөҙлөкбаева килделәр. Уларҙың һәр береһе эштәренә бирелгән тәжрибәле хеҙмәткәрҙәр булдылар. Гәзит сығарыуҙан башҡа, китаптар, бланктар баҫа инек. Коллективыбыҙ бик татыу булды, шатлыҡтарын да, ҡайғыларын да бергә бүлештек. Замана нисек кенә ауыр булһа ла, эштә лә тырышып эшләнек, балаларыбыҙҙы ла уҡытырға тырыштыҡ, колхозға ла ярҙам итергә ваҡыт таба – баҫыуҙарҙа сөгөлдөр уташа инек. Һәм гәзиттең бер һаны ла сыҡмайынса ҡалманы. Күңелле итеп эшләнек тә, ял итә лә белдек.
Тәбиғәт ҡосағында Матбуғат көндәрен һәм башҡа байрамдарҙы күңелле итеп үткәрә инек. Элекке мөхәррир Миҙхәт Рәжәпов барыбыҙҙы йыйып еләк-емеш совхозына еләк, урманға бәшмәк йыйырға алып барған саҡтар ҙа яҡты хәтирәләр булып һаҡлана. 8 март, Яңы йыл байрамдарын бергәләшеп үткәрҙек.
Бергә эшләгән өлкән һәм йәш быуын хеҙмәттәштәремде йыш ҡына һағынып иҫкә алам. Уларҙың һәр береһе гәзит сығарыуҙа үҙҙәренең тос өлөшөн индерҙе һәм ҡайһы берәүҙәре бөгөн дә эшләүен дауам итә, - ти Зөләйха Чулли ҡыҙы, хәтирәләргә бирелеп. - Инде күптән хаҡлы ялда булһам да, гәзиттең һәр һанын көтөп алам. Ул киләһе көндө әллә нисә тапҡыр сығып, почта тартмаһын асып ҡарайым. Уға айырым ваҡыт бүлеп, хәрефен дә төшөрөп ҡалдырмайынса уҡып барам. Бөгөн район гәзите өсөн генә түгел, хатта өлкә һәм үҙәк баҫмалар өсөн ҡатмарлы осор, сөнки һәр өйҙә телевидение, интернет селтәре, компьютерҙар бар. Ләкин район баҫмалары “йәшәһен”, уны алдырһындар, уҡыһындар ине. Форсаттан файҙаланып, хеҙмәттәштәремде Рәсәй матбуғаты көнө менән ҡотлайым һәм һәр береһенә иҫәнлек-һаулыҡ, ижади уңыштар теләйем, - тип изге теләктәрен еткерҙе матбуғат ветераны.
Бөгөн Зөләйха Узакова хаҡлы ялда. Балаларының иғтибарын, ейәндәренең хөрмәтен тойоп ғүмер итә. Ҡыҙҙары Әлфиә кейәүе Ильяс менән Ҡырмыҫҡалы ауылында йәшәйҙәр. Ҙур итеп йорт һалып ингәндәр. Ейәне Руслан армия хеҙмәтендә булып, бөгөнгө көндә Көнсығыш иҡтисад-юридик акамедияһында уҡый. Икенсе ҡыҙы Зөлфиә - Һаҡлыҡ банкында, кейәүе Денис “Газпром”да эшләй. Ейәне Артемға 14 йәш – ул гимназияла 8-се класта уҡып йөрөй. Зөләйха Чулли ҡыҙы әлеге ваҡытта улы Марат менән бергә йәшәйҙәр. Ләкин ул бер минут та тик ултырырға яратмай: баҡсаһында күп төрлө гөл-сәскәләр үҫтерә, ейәндәрен ҡараша.
Венера Баҡыева.
Фото ғаилә архивынан алынды.