Үтәгән ауылының хат ташыусыһы Эльвира Бикҡолова ла үҙенең бала сағын нәҡ шулай хәтерләй.
- Беҙ үҫкәндә гәзит-журналдар өйгә ҡосаҡ-ҡосаҡ килә торғайны. Яңы баҫылған гәзиттәрҙең еҫе әле лә хәтеремдә. Бәлки, шуғалыр ҙа хат ташыусы эше күңелемә яҡындыр, - ти ул.
Эльвира Бикҡолова бына өс йыл инде ауылдаштарын яңылыҡтар менән таныштырып тора, ваҡытлы матбуғатты, квитанцияларҙы Яңы Ҡыйышҡы ауылынан барып алып ҡайтып, йорт һайын таратып сыға. Шулай уҡ почтанан алып ҡайтҡан тауарҙарҙы һатыу ҙа уның бурысына инә.
Эльвира Әхмәт ҡыҙы күрше Яңы Ҡыйышҡы ауылында тыуып үҫеп, Үтәгән ауылына килен булып төшә. Кейәүгә килгәнсе Ҡырмыҫҡалы һөнәрселек училищеһының бухгалтерҙар курсын тамамлай. Иҫәп-хисапты яҡшы белеүе арҡаһында магазинда һатыусы булып эшләй. Рәүфил Рауил улы менән өс бала тәрбиәләп үҫтерәләр. Улдары Руслан армияла хеҙмәт итеп ҡайтып, Ҡарлыман тимер юлы станцияһында эшләп йөрөй. Ҡыҙҙары Илүзә костюмдар буйынса рәссам-дизайнер белгеслеген алып, баш ҡалала эшләй. Кесе ҡыҙҙары Эльвинаға 11 йәш. Ә ғаилә башлығы Ҡабаҡ кирбес заводында - һаҡсы.
Бикҡоловтарҙың йорт эсе ботаника баҡсаһын хәтерләтә. Әллә нисәмә төрлө фиалкаларҙан башлап, түбә таҡтаһына тиклем үҫкән ағас гөлдәренең ниндәйе генә юҡ. Ғөмүмән, зауыҡ яратҡан хужабикә һәр бер мөйөштө үҙ ҡулдары, фантазияһы менән биҙәгән. Гөлдәр араһында, стеналарҙа күбәләктәре лә, ҡоштары ла һоҡланырлыҡ. Ҡышҡы оҙон кистәрҙә бәйләм тоторға ла ярата икән ул. Диван, ҡәнәфиҙәргә үҙе бәйләгән сағыу биҙәкле япмалар ҙа бәйләп ҡуйған.
- Ауыл ерендә йәшәгәс, мал-тыуар, ҡош-ҡорт аҫрамай, йәшелсә-емеш үҫтермәй ҙә булмай. Бар нимәгә лә тормош иптәшем менән өлгөрөргә тырышабыҙ. Күрше ауылдан почтаны барып алырға ла ул ярҙам итә, - ти Эльвира Әхмәт ҡыҙы.
Эйе, почтальон хеҙмәте еңел түгел. Улар ҡышҡы һалҡындарҙа ла, юлдарҙы буран баҫып китһә лә, ел-ямғыр булһа ла, гәзит–журналдарҙы ваҡытында тапшырырға тейеш. Ауылдаштары өсөн тырышып хеҙмәт иткән хат ташыусыларҙың эшен аңлап, ваҡытлы матбуғаттың артабан да йәшәүенә булышлыҡ итеп, гәзиттәргә яҙылып ҡалыу мәлен файҙаланып ҡалайыҡ, дуҫтар.
Гөлсәсәк Аласова.
Автор фотоһы.