«Урал батыр» бәләкәстәрҙең йөрәгендә

Был әһәмиәтле ваҡиға беҙҙең бәләкәй тәрбиәләнеүселәребеҙ өсөн танып белеү генә түгел, ә тәрән хисле лә булды, уларға боронғо легендалар, батырлыҡтар һәм мәңгелек ҡиммәттәр донъяһына ишектәр асты.
Аҙна эпос геройҙары образында балаларҙың әкиәт атмосфераһына сума алырлыҡ сағыу тамаша ме­нән башланды. Тәрбиәселәр бәләкәстәргә Урал батырҙың батырлыҡтары, яуызлыҡ менән көрәше, ғәҙеллеккә ынтылышы һәм тыуған еренә сикһеҙ һөйөүе тураһында аңлайышлы итеп һөйләне. Элиза Ҡолдәүләтова эпостан өҙөк ятланы.
Эпостың төп идеяһы – яуызлыҡ өҫтөнән яҡшылыҡтың еңеүе, халыҡтың именлеге өсөн үҙ-үҙеңде ҡорбан итеү – һәр балаға мауыҡтырғыс хикәйәләр һәм матур иллюстрациялар аша еткерелде.
Мәҙәниәткә һөйөү уятыуҙың иң яҡшы ысулы – ижад һәм уйын аша. Балалар яратҡан геройҙарын әүҙем рәүештә төшөрҙө һәм уларҙы пластилиндан эшләне. «Урал-батыр»ҙан бәләкәй генә күренештәр ҡуйыу айырым һоҡланыу тыуҙыр­ҙы, унда һәр бала үҙен ысын герой итеп тоя алды. «Урал-батыр» эпосы – балаларҙы ҡыйыу, намыҫлы, игелекле булырға һәм үҙ Ватанын яратырға өйрәтеүсе аҡыл сығанағы.
Был аҙналыҡ тәрбиәләнеүселәребеҙҙең йөрәктәрендә тәрән эҙ ҡалдырыр. Ошондай бөйөк әҫәрҙәр менән танышыу тик эрудициялы ғына түгел, ә Урал батыр өлгөһөнә эйәреп, донъяға яҡшылыҡ һәм ғәҙеллек алып килергә әҙер булған рухи бай кешеләр тәрбиәләренә ышанабыҙ.
Әлиә Байғусҡарова,
“Бал ҡорто” балалар баҡсаһы тәрбиәсеһе.