Яҡты йондоҙ булып балҡый “Йондоҙ”ҙар!

Юбилей уңайынан “Йондоҙ”ҙар ойошторған йәмле бейеү байрамын асып, район хакимиәте башлығы Әлфир Сабиров:

- Бейеү – ул сәнғәт төрө генә түгел, ә шулай уҡ характер, ныҡышма­лы хеҙмәт, башлағаныңды еренә еткерә белергә, то­тош коллектив менән бер булып йәшәргә өйрәнеү мәктәбе лә. “Йондоҙ” ан­самбле үҙенең бейеүҙәре менән сәнғәт өлкәһенә тос өлөш индерә. Улар районыбыҙ тарихында ҙур эҙ ҡалдыралар, бик күп таланттар үҫтерәләр. Бында ата-әсәләрҙең һәм, әлбиттә, етәкселәрҙең ҙур хеҙмәте ята. 1995 йылда районыбыҙға йәш бел­гестәр – Мөхәмәтгәрәев­тар ғаиләһе күсеп килде. Светлана Мәғбул ҡыҙы ошо ансамблде төҙөй һәм шул саҡта уҡ был коллектив республика һәм федераль кимәлдә төрлө конкурстарҙа, фе­стивалдәрҙә ҡатнашып, районды данлай башлай. “Йондоҙ”ҙоң киләсәге яҡты булыры шунда уҡ аңлашыла ине. 2008 йыл­дан ул өлгөлө ансамбль исемен йөрөтә. Балаларға бейеү серҙәрен өйрәткән остаздар – Гөлназ Хәки­мова һәм йәш белгестәр – Руслан менән Рөстәм Сәйғәфәровтар бөгөн дә райондың бейеү сәнғә­тенә, балаларға тәрбиә биреүҙә һәм уларҙы юға­ры мәҙәниәткә ылыҡты­рыу эшендә ең һыҙғанып эшләйҙәр, - тип, ансамбл­гә яңынан-яңы уңыштар теләгәс, “Йондоҙ”ҙоң етәксеһе Гөлназ Хәкимо­ваға Башҡортостан Респу­бликаһының Мәҙәниәт министрлығының Маҡтау ҡағыҙын, Руслан менән Рөстәм Сәйғәфәро­втарға район хакимиәте­нең Маҡтау ҡағыҙҙарын тапшырҙы.

Артабан һәр сығышты көслө алҡыштарға күмеүсе тамашасылар рәхәтләнеп төрлө милләт мәҙәниә­тен сағылдырған бейеү донъяһына сумды. Ике сәғәттән ашыу ваҡыт эсендә генә улар берсә Татарстанға, берсә Ҡы­тайға, Кавказға, Ҡалмыҡ республикаһына сәйәхәт ҡылды. Сәхнәне дер һел­кетеп, “Йондоҙ”ҙоң бө­гөнгө составы ла, башҡа йылдарҙың сығарылыш төркөмдәре лә, хатта әсәйҙәр ҙә сығыш яһаны был көндө. Ата-әсәйҙәр үҙҙәренең күңел түренән сыҡҡан рәхмәттәрен бел­дерергә лә онотманылар һәм етәкселәрҙе гөл­ләмәләргә күмде.

Матур тамаша һуңын­да район мәҙәниәт бүле­ге начальнигы Виктория Мөхәмәҙиева, байрам ҡу­наҡтары – Башҡортостан Республикаһының халыҡ артисы Фәниә Амантаева, ансамблде төрлө йылдарҙа етәкләүселәр – Зөлфиә Илмурзина, Гөлназ һәм Эмиль Һөйәрғоловтар, Элеонора Лаврентье­ва изге теләктәрен һәм маҡтау һүҙҙәрен яуҙырҙы. Тамашаны оҫта итеп алып барыусы Филүс Шәң­гәрәев йәмле сараға тағы ла йәнлелек өҫтәне.

Бына шундай матур бейеү байрамы менән ҡы­уандырҙылар беҙҙе Ҡы­рмыҫҡалы “Йондоҙ”ҙа­ры. Уларға киләсәктә лә ҙур уңыштар, асыштар, яңынан-яңы бейеүҙәр теләйбеҙ. Гел шулай татыу, берҙәм булып ҡалығыҙ һәм тағы ла оҙаҡ йыл­дар яҡты йондоҙ булып балҡығыҙ!

Розалия БИКТИМЕРОВА.

Автор фотолары.