Милли кейемдәрҙә халыҡ тарихы сағыла

Башҡортостанда 164 милләт вәкиле йәшәй. Уларҙың һәр ҡайһыһы үҙенең та­рихи, мәҙәни үҙенсәлектәре менән ҡабат­ланмаҫ. Милли кейем көнө – ата-баба­ларҙан ҡалған рухи мираҫҡа, халыҡтарҙың тарихына тағы бер ентекләберәк күҙ һалыу өсөн матур сәбәп тә. Ошо көндә ойошто­ролған ҡыҙыҡлы, күркәм саралар аша үҫеп килгән быуын да халыҡ мәҙәниәтенең иф­рат ҡәҙерле, баһалы, аҫыл төшөнсә икә­ненә төшөнә, унда тарихи үткәндәргә ҡа­рата ҡыҙыҡһыныу көсәйә.

Милли кейем көнөн билдәләү – ул Башҡортостандағы күп төрлө милләт ха­лыҡтары араһында берҙәмлекте арттырыуға, татыулыҡ ептәрен нығытыуға бәйле ҙур, мөһим эштәрҙең бер өлөшө лә.

Милли кейем – халҡыбыҙҙың ҡәҙер­ле ҡомартҡыһы, уның эске булмышы­ның, күңел донъяһының, көнкүрешенең сағылышы. Борондан милли кейем нәҫел­дән-нәҫелгә күскән оло байлыҡ, ҡәҙерле ҡомартҡы. Улар әле лә үҙҙәренең матур­лығы, сағыулығы менән күҙҙең яуын алып тора.

Олокүл ауылы мәҙәниәт йортонда милли кейем көнөнә арналған “Башҡор­тостан халыҡтарының милли кейемдәре” тип аталған сағыу һәм ҡыҙыҡлы фоль­клор сәғәте уҙҙы. Сарала ҡатнашыусылар Башҡортостан Республикаһында йәшәүсе халыҡтарҙың ғөрөф-ғәҙәттәре, йолалары һәм мәҙәниәте менән танышты.

Мәҙәни ойоштороусылар Зөлфиә Абдуллина менән Йондоҙ Бикташева башҡорт, татар һәм рус халыҡтарының милли кейемдәренең бай тарихы һәм үҙен­сәлектәре тураһында һөйләнеләр. Улар милли кейемдең ябай кейем генә түгел, ә халыҡтың рухын, намыҫын, мәҙәниәтен сағылдырған, көнкүрешен һәм эстетик тра­дицияларын күрһәткән ғәмәл дә булыуын һыҙыҡ өҫтөнә алдылар.

Сара һуңында “Түбәтәй”, “Кейемдәр тураһында йомаҡтар” уйындары ойошто­ролдо. “Һәр совет кешеһе нимә алырға хы­ялланған?” викторинаһы һорауҙары ла ҙур ҡыҙыҡһыныу уятты. Шулай уҡ ҡунаҡтарға республикабыҙҙа йәшәгән халыҡтарҙың милли мәҙәниәтен сағылдырған “Милли кейемдәр” күргәҙмәһе оҡшаны.

Киләсәктә лә милли кейемдәребеҙ йәшәһен, һәр кем үҙ халҡының мәҙәниә­тен һаҡлаһын. Милләтебеҙ киләсәге беҙҙең ҡулда!

Ләйсән НӘЗИРОВА.

Олокүл ауылы.