Яңы төҫтәр менән балҡый

Яңы төҫтәр менән балҡый

«Мәҙәниәт» милли проектының «Мәҙәни мөхит» төбәк проекты сиктәрендә Олокүл ауылы мәҙәниәт йортона капиталь ремонт уҙғарылды. Яңырыу кисер­гән һәм яңы төҫтәр менән балҡыған мәҙәниәт усағын асыу тантанаһы гөрләп уҙҙы.

Һәр ваҡыттағыса ҡу­наҡтарҙы милли ризыҡтар, йыр-бейеү менән ҡар­шы алып, ҡыҙыл таҫманы киҫкәс, тантанала ҡатна­шыусылар өр-яңы төҫ алған бина буйлап сәйәхәт ҡыл­ды. Һәр бүлмәлә байрам ҡунаҡтарын көләс йөҙлө, шат балалар һәм ололар ҡаршы алып, оҫталыҡта­рын күрһәтте, ҡыуаныста­ры менән бүлеште.

Бигерәк тә ҡунаҡтарҙы мәҙәниәт йортоноң икенсе ҡатында урынлашҡан ҙур булмаған бүлмәлә Олокүл ауылының ағинәйе Флүрә Самиҡованың тырышлығы менән булдырылған күр­гәҙмә залы ҡыҙыҡһындырҙы. Бында башҡорт һәм татар халҡының үткәне сағылыш тапҡан.

Сараның сәхнә түрендә үткән өлөшөн район хаки­миәте башлығының соци­аль мәсьәләләр буйынса урынбаҫары вазифаһын башҡарыусы Андрей Матвеев асты һәм:

- Күп милләтле Ҡыр­мыҫҡалы районында 30-ҙан ашыу милләт вәкилдәре татыу һәм дуҫ йәшәй. Би­герәк тә мәҙәниәт өлкәһен­дә улар сағыу балҡый. Ижа­ди коллективтар үҙҙәренең сығыштарында милли ғөрөф-ғәҙәттәр үҙенсәлек­тәрен оҫта күрһәтеүгә өл­гәшә. Шуға күрә лә мәҙә­ниәт учреждениеларында уңайлы һәм хәүефһеҙ шарт­тар тыуҙырырға тырышыу мөһим, - тине һәм күп йыллыҡ намыҫлы хеҙмәт­тәре өсөн Ҡырмыҫҡалы үҙәкләштерелгән китапха­налар системаһының 1-се категориялы китапхана­сыһы Айгөл Йәрмиеваға, Олокүл мәҙәниәт йортоноң мәҙәни ойоштороусыһы Илнур Бикташевҡа, Ба­лалар сәнғәт мәктәбенең һынлы сәнғәт класы уҡы­тыусыһы Гөлсөм Ташлыҡо­ваға, “Стройбытсервис” яуаплылығы сикләнгән йәмғиәте директоры Рау­ил Ҡыямовҡа район хаки­миәтенең Рәхмәт хаттарын тапшырҙы.

Байрам ҡунағы, БР Мәҙәниәт министрлығы­ның социомәҙәни эш­мәкәрлек бүлеге начальни­гы Ирек Иманғәлин:

- Бында хәҙер ижад итеү һәм эшләү өсөн барлыҡ шарттар тыуҙырылған. Уч­реждениела Балалар сәнғәт мәктәбе лә, китапхана ла, йәмле тамашасылар залы ла бар, төрлө түңәрәктәр ҙә эшләй. Был бик мөһим социаль объект. Мәҙәниәт йортонда һәр саҡ күңелле тауыштар ишетелһен, бын­да һәр кем үҙен ҡыҙыҡһын­дырған шөғөл тапһын, ба­лалар ижад итһен, - тигән изге һүҙҙәренә ҡушып, мәҙәниәт өлкәһендә күрһәткән уңыштары өсөн Балалар сәнғәт мәктәбенең фортепиано класы уҡыты­усыһы Әлфиә Гәрәеваға, Олокүл мәҙәниәт йорто­ноң мәҙәни ойоштороу­сыһы Ләйсән Нәзироваға, Олокүл моделле ауыл ки­тапханаһы китапханасыһы Рәдифә Кинйәбаеваға БР Мәҙәниәт министрлығы­ның Рәхмәт хаттарын тапшырҙы.

Яңыртылған мәҙәниәт йортон асыу тантанаһы районыбыҙ талланттары әҙерләгән йәмле концерт программаһы менән та­мамланды. Шығрым тулы залдағы тамашасылар һәр сығышты дәррәү алҡыштар менән оҙата барҙы.

Яңы һулыш алған мәҙә­ниәт усағы тағы күп йылдар ауыл халҡын ҡыуандырып торһон!