Мәҙәниәт усаҡтары яңы һулыш ала

Мәҙәниәт йорттары, клубтар, китапханалар ремонт эштәре кисереп яңы һулыш ала.
Олокүл ауылының клуб бинаһында ла ошо көндәрҙә капиталь төҙәтеү эштәре ҡайнай. Уны үткәреү “Реновация – мәҙәниәт өлкәһе муниципаль учреждениеларының матди-техник базаһын капиталь ремонтлау һәм нығытыу” йүнәлеше буйынса республика бюджетынан субсидиялар биреү конкурсында еңеү һөҙөмтәһендә мөмкин булды.
- Егерме биш йыл эшләү осоронда клуб тәүге тапҡыр капиталь төҙәтеү кисерә. Бөгөн бында ҡыйыҡ, түшәм, иҙән алмаштырыла, диуарҙар буятыла, сәхнә яңыртыла, мөмкинлектәре сикләнгәндәр өсөн бәҙрәф эшләнә, шулай уҡ эске биҙәү эштәре алып барыла.
Капиталь ремонттан һуң өр-яңы төҫ аласаҡ зауыҡлы, яҡты һәм йылы клубта тормош элеккенән дә нығыраҡ гөрләр һәм халыҡ ауыр эштән һуң бында килеп ял итеп, яҡшы кәйеф алыр, тип уртаҡлаша Олокүл клубы мөдире Ләйсән Нәзирова.
Әлеге ваҡытта Шайморатов ауылында ла күп функциялы клубты ремонтлау һәм биләмәне төҙөкләндереү эштәре дауам итә. Ҡоймалар һәм ҡапҡалар буятылған. Үҙ көстәре менән тамаша залының сәхнә кейемдәре яңыртылған. Әлеге ваҡытта бинаға ингән урын, арка һәм Рәсәй Геройы М.М.Шайморатов бюстын буяу эштәре алып барыла.
- Шайморатов күп функциялы клубында республикала берҙән-бер М.Шайморатовҡа арналған күргәҙмә залы эшләй. Бында республиканан ғына түгел, бөтә Рәсәйҙән һәм сит илдәрҙән дә ҡунаҡтар килеп тора. Уларҙың һаны йылына 17 меңдән артып китә.
Шуға күрә йыл һайын үҙ көсөбөҙ менән ремон эштәре үткәрәбеҙ, клубтың тирә-яғын һәр саҡ таҙалыҡта һәм тәртиптә тотабыҙ.
Тимәк, 23 августа генерал Шайморатовтың тыуыуына 125 йыл тулыуҙы ҡаршыларға әҙерлек киң ҡолас менән бара, тип әйтә алам, - тине Шайморатов күп функциялы клуб мөдире Гөлнара Ниғмәтуллина.
Быйыл шулай уҡ “Урындағы башланғыстарға ярҙам” программаһы сиктәрендә Үрге Төкөн ауылы клубының да түбәһен төҙөкләндереү һәм газ үткәреү көтөлә.
Гөлсәсәк Аласова.

Виктория Мөхәмәҙиева, мәҙәниәт бүлеге начальнигы, йәмәғәтселек фекере лидеры: - Мәҙәниәт өлкәһе, әлбиттә, республика етәкселегенең иғтибарынан, ярҙамынан тыш эшләй һәм алға бара алмаҫ ине. Олокүл ауыл мәҙәниәт йортонда мәҙәниәт инфраструктураһын үҫтереүҙең сифат яғынан яңы кимәлен тәьмин итеү (“Мәҙәни мөхит”) төбәк проекты сиктәрендә мәҙәниәт өлкәһе учреждениеларын үҫтереү буйынса эштәр алып барылыуы быға асыҡ миҫал булып тора.
Беҙ бындай үҙгәрештәргә бик шатбыҙ, заманса төҫ алған мәҙәниәт усаҡтары ауыл халҡының яратҡан ял итеү урыны булһын һәм үҙешмәкәр сәнғәтте артабан үҫтерһен.
Белешмә. Башҡортостанда 2019 - 2024 йылдарҙа “Мәҙәниәт” милли проекты буйынса финанслау 7,1 миллиард һум тәшкил итте. Шуның 1,4 миллиард һумы – федераль ҡаҙнанан.
Һуңғы биш йылда республикала 98 мәҙәниәт объекты төҙөлдө һәм капиталь ремонтланды. Улар – ауыл мәҙәниәт йорттары, дәүләт объекттары, китапханалар, музейҙар.