Фәйрүзә ҠОТЛОБАЕВА, Ҡарлыман ауылы, Ш.Бикҡол исемендәге музей етәксеһе:
- 1984 йылдан бирле “Сатҡылар” театрында йөрөйөм. Ошо 40 йыл эсендә бик күп ролдәр башҡарырға тура килде. “Һауалағы торна”ла Ғәйшә, “Аҡҡошом минең”дә Гөлъямал, “Әсәйҙәр һәм бәпәйҙәр”ҙә табип-гинеколог булып уйнаным. Шулай уҡ “Их, кәләше лә, кәләше” спектаклендә ҡатнаштым. Театрыбыҙ менән төрлө конкурстарҙа еңеүҙәр яулауға ирештек. Әлеге көндә ҙур булмаған коллективыбыҙ “Рәхмәт” тигән премьера әҙерләй. Үҙемә тапшырылған ролдәрҙең барыһын да яратып башҡарам, ныҡ оҡшай.
Театрҙа уйнаған саҡта бөтә мәшәҡәттәрең онотола, кәйефтәр күтәрелә. Бөтөнләй икенсе образға кереп китәһең һәм бер аҙға шул кеше тормошо менән йәшәйһең. Һөнәрем буйынса уҡытыусы, тәрбиәсе булһам да, үҙ ғүмерем эсендә сәхнәлә бик күп башҡа һөнәр эйәләренең образдарын тыуҙыра алыуым менән бәхетлемен. Һин уйнаған ролдәрҙе тамашасылар ҙа ихлас ҡабул итһә, күңелгә бигерәк тә рәхәт, үҙеңде ысын әртис итеп хис итә башлайһың, хатта.
Театрһыҙ донъя буш ул. “Сатҡылар” йәшәһен һәм артабан да йәшнәһен, яҡташтарым театрҙарға килһендәр, даими йөрөһөндәр ине тигән теләктәремде еткергем килә.