Әлфиә БИКТАШЕВА, Ҡырмыҫҡалы ауылы, шәхси эшҡыуар:
- Театрҙа уйнарға күптән хыяллана инем. Бер танышым район Мәҙәниәт һарайындағы ансамблдә йырлай. Бер ваҡыт ул мине: “Әйҙә беҙҙең менән йырларға”, - тип саҡырҙы. “Йырларға әлегә йөрөгөм килмәй, әммә берәй спектаклдә уйнап ҡарар инем”, - тигәйнем уға. Был турала ул Флүрә Низамоваға әйткән булған икән. Бер көнө Флүрә Ғәлинур ҡыҙы яныма килде лә: “Бер ролгә кеше эҙләй инек, уға нәҡ һеҙ тура киләһегеҙ”, - тип мине репетицияға саҡырҙы. Был 2023 йылдың март айы ине. Шулай итеп мин “Сатҡылар” театрында уйнай башланым. Т.Миңнуллиндың пьесаһы буйынса “Әсәйҙәр һәм бәпәйҙәр” спектаклендә әсә ролен башҡарҙым. Май айында Ҡырмыҫҡалыла был спектаклдең премьераһы булды, ә октябрь айында “Театраль Өфө” республика фестивалендә I дәрәжә лауреат дипломын алдыҡ.
Театрҙа уйнарға тигән хыялымды тормошҡа ашырыуыма бик шатмын. Ролемде яратып башҡарҙым һәм артабан да дауам итермен, тип уйлайым. Хәҙер инде киләсәк тормошомдо театрҙан айырым күҙ алдына ла килтерә алмайым. Тағы ла ролдәр көтөп ҡалам.