Светлана ӘХМӘҘИЕВА, Ҡырмыҫҡалы ауылы, йорт хужабикәһе:
- Техник һәм иҡтисадсы һөнәре алһам да, мин үҙем ижади кешемен. Район Мәҙәниәт һарайындағы күп сараларҙа әүҙем ҡатнашам, алып барыусы ла булам, “Ҡырмыҫҡалы королеваһы – 2022”лә еңеү яуланым.
“Сатҡылар” театрына 2019 йылда килдем. “Игеҙәктәр”, “Әсәйҙәр һәм бәпәйҙәр” спектаклдәрендә төп ролдәрҙең береһен башҡарҙым. Әле тағы бер спектакль әҙерләйбеҙ. Тиҙҙән уның премьераһын сәхнәгә сығарасаҡбыҙ.
Театр миңә үҙемдең ижади мөмкинлектәремде асырға ярҙам итә. Сәхнә тормошон, театрҙы, тамашасыларҙы шул тиклем ныҡ яратам. Һәр образды тыуҙырыуға бөтә күңелемде бирәм. Барлыҡ ролдәремде башҡарғанда, спектаклдең башынан аҙағына тиклемге арауыҡта мин үҙемдең бөтә һәләтемде асырға, режиссер ҡуйған талаптарҙы еренә еткереп атҡарып сығырға ҙур көс һәм тырышлыҡ һалам.
Әлбиттә, тамашасы ла спектаклдең бер өлөшө булып тора. Ролдең нисек уйналыуы ла ниндәйҙер кимәлдә уға бәйле. Тамашасы спектаклде бик ихлас ҡараһа, уйнауы ла еңелерәк, ә улар беҙҙең сығыштан күңелдәренә рухи аҙыҡ алып ҡайталар икән, беҙгә лә рәхәт. Тамашаларҙа тағы ла осрашырға яҙһын!