Театр – бөгөнгө көндә лә республиканың һәм унда йәшәүсе кешеләрҙең мәҙәни кимәлен, рухи байлығын билдәләүсе изге урын булып тора. Һуңғы йылдарҙа элекке замандағы кеүек театрҙарға тамашасыларҙың эркелеп йөрөмәүе генә бер аҙ күңелде ҡыра.
Район үҙәгендә күп йылдар инде “Сатҡылар” халыҡ театры уңышлы эшләп килә. 2000 йылдан алып театр менән режиссер Флүрә Низамова, 2022 йылдан Нәркәс Хәлитова етәкселек итә. Районыбыҙ таланттары ярҙамында бихисап спектаклдәр сәхнәгә сығарылды. Театр коллективы тамашасыларын үҙҙәренең халыҡсанлығы, тәбиғилеге менән йәлеп итеүен дауам итә. Район сәхнәһен гөрләткән, конкурстарҙа лайыҡлы билдәләнгән “Сатҡылар”ҙың һәүәҫкәр артистарының күбеһе менән һеҙ спектаклдәр аша ныҡ таныш. Бөгөн уларҙың бер нисәүһе гәзитебеҙ битенең майҙан түрен биләй.