“Сатҡылар” беренселекте яуланы

“Сатҡылар” беренселекте яуланы

«Мәҙәниәт» милли проектының «Ижади кешеләр» проектын тормошҡа ашырыу сиктәрендә 30 октябрҙән 1 ноябргә тиклем Өфөлә «Театраль Өфө» Республика балалар һәм йәштәр театрҙары фестивале үтте. Фестиваль сик­тәрендә Мостай Кәрим исемендәге Милли йәштәр театрының Бәләкәй за­лында Өфө, Салауат, Белорет, Бәләбәй ҡалаларынан, Ҡырмыҫҡалы, Туй­мазы райондарынан 12 спектакль күрһәтелде.

Режиссер Нәркәс Хәлитова етәкселеген­дәге Ҡырмыҫҡалының “Сатҡылар” халыҡ те­атры был фестивалдә Т. Миңнуллиндың пье­саһы буйынса ҡуйылған “Әсәйҙәр һәм бәпәй­ҙәр” спектакле менән 1-се дәрәжә лауреат ди­пломына лайыҡ булды.

- Режиссерҙар һәм театр коллективтары етәкселәре өсөн семи­нар-практикумда ҡат­нашып, оло тәжрибә ту­плап ҡайттым. Шулай уҡ беҙҙең өсөн профессор, Рәсәйҙең һәм Башҡор­тостандың халыҡ арти­сы Таңсулпан Бабиче­ва менән осрашыу һәм уның «Ваҡыт көҙгөһөн­дә» автобиографик ки­табының исем туйы ойошторолдо. Респу­бликаның һәүәҫкәр те­атр ижадын үҫтереү про­блемаларына арналған семинарҙа ҡатнашыусы­лар менән түңәрәк өҫтәл үткәрелде.

Ҙур бәйгелә ҡатна­шыуыбыҙ һәм лайыҡлы урын алыуыбыҙ өсөн ҡыуаныс һәм ғорур­лыҡ тойғоһо кисерә­беҙ. Мәртәбәле жюри ағзалары алдында ҡау­шап ҡалмайынса, матур сығыш яһағандары, рол­дәрҙе оҫта башҡарғанда­ры һәм һәр береһе үҙе­нең образын аса алғаны өсөн “Сатҡылар” халыҡ театры артистарының барыһына ла оло рәх­мәтлемен. Киләсәктә тағы ла ҙурыраҡ еңеүҙәр, бейегерәк үрҙәр яулар­быҙ, тип ышанам, - ти Нәркәс Энгель ҡыҙы.

Амин, шулай булһын!

Розалия НАЗАРОВА.