Шиғырҙарҙа – көҙгө моң

Алтын көҙ тәбиғәткә сағыулыҡ ҡына түгел, йөрәктәргә дәрт, күңелгә илһам өҫтәй торған мәл. Нәҡ ошо алтын көҙ мәлендә барлыҡ мәҙәниәт йорттарында яңы ижади миҙгелдәр асыла. Беҙҙең ауыл клубында ла шуға арнап, клуб сиктәрендә ойошторолған "Илһам" әҙәбиәт түңәрәге ағзаһы, үҙенең ялҡынлы шиғырҙары менән кисәләргә йәм өҫтәүсе Әлфиә Хәйретдинова менән осрашыу кисәһе ойошторолдо.

Әлфиә Баязит ҡыҙы үҙенең яңы ижад ителгән шиғырҙарын тамашасылар иғтибарына тәҡдим итте. Уларҙа – көҙгө һағыш та, тәбиғәт муллығы ла, һөйөү, наҙ һәм ихласлыҡ та сағыла ине.
"Сатҡы" балалар халыҡ инструменттары ансамбленең сығыштарын иһә кисәгә айырыуса бер йәм өҫтәне. Саҡырылған ҡунаҡтар араһынан Әнисә апай Ҡаһарманова һәм Ғәйшә апай Искандәровалар изге теләктәрен теләп, ил сиген һаҡларға киткән ир-егеттәребеҙҙең иҫән-имен ҡайтыуҙарын теләп сүрәләр уҡынылар.
Сарала йәштәргә үрнәк булып йәшәүсе ауылыбыҙҙың әүҙем ағинәйе Ғәйшә апай Искәндәрованы ла бүләкләп үттек.
Йәштәр ҙә, өлкәндәр ҙә бер булып, бер-береңдән үрнәк алып йәшәү - үҙе ҡыуаныс.

Фәһимә Абдрафиҡова.
Бишауыл-Уңғар ауылы.