Әкиәт донъяһында булып ҡайттылар

Прибельский мәктәбенең 7 “В” кла­сы уҡыусыһы Аслан Биктимеров яҡшы уҡый, спорт менән шөғөлләнә һәм төр­лө конкурстарҙа, олимпиадаларҙа әүҙем ҡатнаша. Ул көрәш, ирекле көрәш, грек- рим көрәше буйынса ярыштарҙа ҙур һөҙөмтәләргә ирешкән.

- Сағыу хис-тойғолар, онотолмаҫлыҡ тәьҫораттар, яңы дуҫтар һәм иң яҡшы вожатыйҙар өсөн мин “Артек”ка сикһеҙ рәхмәтлемен. Был минең тормошомдағы иң бәхетле өс аҙна булды. Үҙемдең отря­дым, дуҫтарым, вожатыйҙар һәм “Артек” менән айырылышыу ҡыйын ине, - тигән тәьҫораттары менән бүлеште Аслан.

- “Артек”ка юлламаны нисек алдың тип һорайҙар күптәр. Грамоталарым буйынса заявка бирҙем дә, конкурстан үттем, “Янтарный” лагерына эләктем. Был лагерь түгел, ә әкиәт донъяһы! Ошо иҫ киткес урын – һәр кемдең бала саҡ хыялы. Бында һәр ваҡыт күңелле, һин һәр ваҡыт нимә менәндер мәшғүлһең, һинең эргәңдә яҡшы вожатыйҙар һәм өс аҙна эсендә бер ғаиләгә әйләнгән ысын дуҫтарың! Һин бында бөтә уңайлыҡтары булған корпуста, алты кешелек бүлмәлә йәшәйһең. Тәҙрәнән иҫ киткес күренеш күренә!

Һауа торошона ҡарап, һәр лагерь үҙ төҫөндәге барлыҡ кейем менән тәьмин итә. Шуға күрә унда күп кейем алып ба­рырға ла кәрәкмәй. Ашханала “Швед өҫтәле” принцибы менән бик тәмле итеп, үҙең теләгәнде һайлап алып ашай­һың. Һәр смена үҙенең тематикаһы буй­ынса төрлө-төрлө саралар ойоштора. Бында күңелһеҙләнеп ултырырға ваҡыт юҡ! Хатта бик оялсан балалар ҙа уйын­дарҙа ҡатнаша, дуҫтар таба. Ҡырым тә­биғәте иҫ киткес – эргәлә генә диңгеҙ шаулай, тирә-яҡта йәшеллек. Бында килгән һәр бала ниндәйҙер яңы һөнәр үҙләштереп ҡайта. Бер тапҡыр булһа ла, “Артек”та булырға яҙһын һәр берегеҙгә! – тип һүҙгә ҡушыла Ҡырмыҫҡалы гим­назияһының 6 “А” класы уҡыусыһы Да­рья Шинова.

Ошо уҡ гимназияның 7 “Б” класында белем алыусы Арина Хәмиҙуллина тхэк­вондо менән шөғөлләнә. Бөтә Рәсәй тур­нирҙарында күп тапҡырҙар еңеү яулаға­ны өсөн ул “Артек”ка барыу бәхетенә ирешкән. Прибельский мәктәбенән Ка­рина Кинйәғолованың яратҡан шөғөл­дәре бигерәк күп. Ул музыка мәктәбенең фортепиано класында, моделдәр мәктә­бендә һәм ирекле көрәш менән шөғөл­ләнергә өлгөрә. Барлыҡ ҡаҙаныштары уны ла “Артек”ка алып барған. “Бөгөн­дән тағы унда барыр инем”, - ти ул.

Төрлө ярыш-турнирҙарҙа әүҙем ҡат­нашыусы Ҡырмыҫҡалы гимназияһының тағы бер уҡыусыһы Данияр Сафинға ла (6 “А” класс) Ҡырымда ял итеү тик яҡшы тәьҫораттар ғына бүләк иткән.

Тағы бер артековсыбыҙ – Ҡырмыҫҡа­лының 2-се мәктәбенең 9 “А” класы уҡыусыһы Динислам Тажетдинов яҡшы билдәләргә генә өлгәшә. Йыл һайын интеллектуаль олимпиадаларҙа һәм төрлө кимәлдәге спорт ярыштарында ҡатнашып, яҡшы һөҙөмтәләр күрһәтә. Хәрби-патриотик сараларҙан, “Гагарин кубогы”нан да ситтә ҡалмай. Барлыҡ уңыштары уны “Артек”лы иткән. “Бын­дай бәхетте һәр бала татып ҡараһын ине”, - тигән теләктә ул.

Ошо уҡ мәктәптең 8 “Б” Шаймо­ратов класында уҡыусы Динә Ғилмет­динова бала саҡтан спорт мәктәбендә полиатлон менән шөғөлләнә һәм еңел атлетика, саңғы ярыштарында тәүге урындар яулай. Спортта юғары күрһәт­кестәргә ирешкәне, хәрби-патриотик сараларҙа әүҙем ҡатнашҡаны өсөн уның күптәнге “Артек” лагерына юллама алыу хыялы тормошҡа аша.

- Миңә унда бик оҡшаны, үҙемә яңы дуҫтар таптым. “Хрустальный” лаге­рының “Ҡара диңгеҙ шкиперҙары” от­рядына эләктем. Беҙ ишкәкле кәмәлә диңгеҙҙә йөҙҙөк, диңгеҙ төйөндәре бәйләргә өйрәндек, Морзе азбукаһын ятланыҡ һәм башҡа бик күп һөнәрҙәр үҙләштерҙек. Мөғжизәле лагерға тағы барғым килә, - ти Динә.

Ҡырымдың тәбиғәте, төрлө ҡыҙыҡлы осрашыуҙар, шоколадлы фонтан, Рәсәй­ҙең төрлө төбәгенән килгән тиҫтерҙәре менән танышыу, ҡыҫҡаһы, “Артек” тик онотолмаҫлыҡ тәьҫораттар ғына ҡалдырған һәләтле уҡыусыларыбыҙҙа. Әйткәндәй, быйыл “Артек” үҙенең 100 йыллыҡ юбилейын билдәләй. Егерме бер көн буйына үткән сараларҙы яҙып бөтөрөрлөк тә түгел. Быларҙың барыһы ла һәр бер баланың күңелендә юйылмаҫ хәтирәләр булып һаҡланыр.

Районыбыҙ уҡыусылары ошо һөҙөмтәләргә өлгәшергә ярҙам итеүсе барлыҡ уҡытыусыларына, тренерҙары­на, мәктәп етәкселегенә, ата-әсәләренә оло рәхмәттәрен белдерәләр.

Барлыҡ изге хыялдарығыҙ тормошҡа ашһын, киләсәктә тағы ла бейегерәк үрҙәр яуларға яҙһын һеҙгә, беҙҙең арте­ковсыларыбыҙ! Ә башҡаларға бындай бәхетте татырға яҙһын!

Лилиә ТАЖЕТДИНОВА.

Ҡырмыҫҡалы ауылы.