«Өләсәйем һандығы»нда ниҙәр бар?

Бындай күркәм сараны Би­шауыл-Уңғар мәҙәниәте йорто ла мәктәп уҡыусылары өсөн даими үткәреп тора. Быйылғы байрам Башҡортостан Республикаһында иғлан ителгән Мах­сус хәрби операцияла ҡатнашҡан яугирҙәр һәм уларҙың ғаиләләренә ярҙам итеү йылына бәйләп алып барылды. Өләсәй (мәҙәниәт йорто мөдире Фәһимә Абдрафиҡова) бала­ларҙы йылдар дауамында серле һандыҡта һаҡланған иҫтәлекле ҡомартҡылар менән таныштырҙы. Һандыҡ төбөнән үҙенең бир­нәһе - кейәүгә сыҡҡанда кейгән балитәкле күлдәге, беләҙеге, дебет шәленең тарихын ма­уыҡтырғыс итеп һөйләне. Дебет шәленең матурлығы, сатлама һыуыҡтарҙа ла ҡатын-ҡыҙҙы һалҡындан һаҡлауы, уны бөгөн дә ябынып йөрөргә кәрәкле­ген әйтеп үтте. Шәлде иңенә һалып, “Шәл бәйләнем” йы­рын йырлап, барыһын да бей­ергә төшөрҙө. Артабан һандыҡ төбөнән бер-бер артлы музыка ҡоралдарын алып, уларҙың ни сәбәпле ҡәҙерле ҡомартҡыға әйләнеүен бәйән итте: “Ба­лалар, мин был ҡурайҙы ныҡ һаҡлайым, сөнки тап ошо ҡу­райҙа әлеге көндә Украина сик­тәрендә яу яланында махсус хәрби операцияла ҡатнашыусы ауылдашыбыҙ Рәйеф Искән­дәров уйнап йөрөнө. Ул мәҙә­ниәт йортонда ойошторолған “Мираҫ” фольклор, “Сатҡы” халыҡ инструменттары , “Там­сы” театр төркөмдәренең әүҙем һәүәҫкәр ағзаһы ине. Илдәр тынысланып, еңеү менән ҡай­тыуын теләйек. Аллаһ бирһә, уның тыуған яҡтарына иҫән- һау ҡайтып, ошо ҡурайында сәхнә түренән моңло көйҙәрен ишетергә яҙһын. Балалар, икен­се иҫтәлекле ҡомартҡыбыҙ – ҡумыҙ. Уның тарихы бөгөнгө көндә махсус хәрби операцияла ҡатнашып, хәбәрһеҙ юғалған ауылдашыбыҙ Руслан Заһиҙул­линға бәйле. Батыр егетебеҙ ошо ҡумыҙҙа уйнай торғайны. Ул да ауыл клубында ойошто­ролған “Мираҫ” фольклор төр­көмөнөң әүҙем ағзаһы булды. Беҙ уның иҫән-һау табылыуына өмөт итеп, ауылыбыҙға ҡай­тыуын көтөп ҡалабыҙ. Өсөнсө иҫтәлекле ҡомартҡыбыҙ – гар­мун. Гармундың да ябайы түгел, яу яланында батырҙарса һәләк булған Ғөбәйҙуллин Зинфир ағайығыҙ уйнап йөрөгән тальян гармуны. Заманында Зинфир Зим улы Һәүәләй ауылы мәҙә­ниәт йортонда директор, район Мәҙәниәт һарайында йырсы, ә аҙаҡҡы йылдарҙа беҙҙең ауыл клубының әүҙем һәүәҫкәре булды. Уның гармунда уйнап, йырлап ебәргәнен, зал тып-тын ҡалып тыңлай торғайны. Батыр егеттәребеҙ – ил күрке, уларҙың һәр береһе маҡтауға лайыҡ”.

Артабан өләсәйебеҙ ҡыйыу яугирҙәребеҙ хөрмәтенә башҡорт халҡының гимнына әйләнгән “Шайморатов гене­рал” йырын йырларға саҡырҙы. Залдағылар һандыҡтан алынған һәр ҡомартҡының серен бел­гәндән һуң, күңелдәре елкенеп, йырҙы айырым бер ғорурлыҡ менән башҡарҙы. Мәктәп уҡыусылары батырҙарға арналған шиғырҙарын да уҡып ишет­терҙе. Артабан ауылыбыҙҙың ағинәйе Флүрә Заһиҙуллина менән башҡорт теле һәм әҙә­биәте уҡытыусыһы Рәмилә Исхаҡова Бишауыл-Уңғар урта мәктәбен тамамлаған 22 егеттең Тыуған ил алдындағы изге бу­рысын үтәү өсөн яуға китеп, ба­тырҙарса һуғышыуын билдәләп үтте. Ысынында иһә, мәктәптә­ге шуҡ малайҙарыбыҙ - бөгөнгө көндә ысын геройҙар.

Артабан ауылыбыҙҙың ағинәйе Райхана Заһиҙуллина яу яланында һәләк булған егет­тәребеҙ исеменә изге доға бағышланы.

Быуындар күсәгилешлелеген сағылдырған, милли ғөрөф- ғәҙәттәрҙе быуындан быуынға тапшырыуға ҡоролған нәфис тамаша ағинәйҙәр әҙерләп кил­тергән ризыҡтарҙы тәмләп, сәй эсеү менән тамамланды.

Рәмилә ИСХАҠОВА, Бишауыл-Уңғар урта мәктәбе­нең башҡорт теле һәм әҙәбиәте уҡытыусыһы.