Каникулдарҙы күңелле үткәрҙек
Яңы ғына башланып торған 2024 йылдың ҡышҡы каникулдарын бик күңелле үткәрҙек. Бишауыл-Уңғар мәктәбенең 5-се класс етәксеһе Ғәлиә Вәлиева менән бергәләп Өфөгә сәйәхәткә барып ҡайттыҡ.
Былай ҙа матур баш ҡалабыҙ байрам көндәрендә тағы ла һоҡланғысыраҡ күренә. Әллә ҡайҙан балҡып торған Ләлә-Тюльпан мәсете үҙе генә ни тора! Беҙ мәсет эсенә инеп, изге теләктәребеҙҙе теләнек. Ә инде Еңеү паркында ҡуйылған танк, пушкалар илебеҙҙең ҡеүәтен күрһәтеп, ғорурлыҡ хистәре уятһа, мәңгелек ут ялҡыны ата-бабаларыбыҙҙың героик үткәнен сағылдыра, ул дәһшәтле ваҡиғаларҙың һәр саҡ күңел түрендә икәнен белдерә.
Артабан беҙҙе Ретро гараж музейы көтә ине. Элекке замандарҙа йөрөгән автомобиль, мототехниканы ҡыҙыҡһынып та, ғәжәпләнеп тә ҡараныҡ.
Ҡала советы майҙаны байрамса гөр килә. Биҙәлгән шыршы, боҙ тауы әллә ҡайҙан үҙҙәренә саҡырып тора. Ошондай форсатты файҙаланмай буламы ни? Күмәкләшеп кинәнеп тау шыуҙыҡ, рәхәтләнеп ял иттек.
Был матур йөкмәткеле сәйәхәт беҙгә бик оҡшаны. Ошо күңелле мәлдәр хәтерҙәребеҙҙә мәңгелеккә уйылып ҡалыр һәм бик күп йылдар үткәс тә, шул ваҡытты һағынып иҫебеҙгә төшөрөп алырбыҙ.
Милана МЕРКУЛОВА,
Бишауыл-Уңғар мәктәбенең 6-сы класс уҡыусыһы.