Туған телгә һөйөү тәрбиәләүселәр!

26–27 октябрҙә баш ҡалабыҙҙа Халыҡ-ара полилингваль белем биреү буйынса форум үтте. Форумда Ҡаҙағастан, Татарстан, Төнъяҡ Осетия-Алания, Бурятия, Карачаево-Черкесия, Дағстан, Удмуртия, Марий Эл, Саха ( Якутия) республикаларынан делегаттар ҡатнашты. Сарала Башҡортостан мәғариф һәм фән министры Илдар Мәүлетбирҙин "Иң яҡшы башҡорт, рус һәм туған тел уҡытыусылары" республика конкурсында еңеүселәргә БР Хөкүмәтенең аҡсалата премияларын тапшырҙы.

Был мәртәбәле бүләккә районыбыҙҙың башҡорт теле һәм әҙәбиәте уҡытыусылары Мөкәй мәктәбенән Фәниә Ишҡарина һәм Ефремкин мәктәбенән Лилиә Юлдашбаева ла лайыҡ булды. Фәниә Ҡасим ҡыҙы был өлкәлә ҙур стажға эйә булған тәжрибәле мөғәллимә булһа, Лилиә Азамат ҡыҙы ла йәш булыуына ҡарамаҫтан, үҙ һөнәрен яратып, бар күңелен һалып башҡарған һәләтле уҡытыусы. Улар икеһе лә уҡытыуҙан тыш, уҡыусылар менән район, республика кимәлендәге бәйгеләрҙә, фәнни-ғәмәли конференцияларҙа ҡатнашып, призлы урындар алалар. Шулай уҡ уҡыусылары башҡорт теле һәм әҙәбиәте буйынса олимпиадаларҙа ла еңеүҙәргә өлгәшә.

Фәниә Ҡасим ҡыҙын һәм Лилиә Азамат ҡыҙын оло еңеүҙәре менән ҡотлайбыҙ һәм тағы ла яңы ҡаҙаныштар, үрҙәр яулауҙарын һәм белем алырға ынтылған уҡыусыларының күберәк булыуын теләп ҡалабыҙ.

Гөлсәсәк Аласова.

Автор:Гульчачак Алачева

Читайте нас

Партнеры