Айырыуса иҫтәлекле булды

Айырыуса иҫтәлекле булды

Быйылғы 1 сентябрь байрамы Ҡырмыҫҡалының 2-се һәм Ефремкин мәктәптәре уҡыусылары, уҡытыусылары һәм ата-әсәләре өсөн айырыуса иҫтәлекле булды, сөнки улар был көндө капиталь ремонттан һуң өр-яңы төҫ алған белем усаҡтарына аяҡ баҫты.

Белем көнөнә арналған тантаналы сараларҙа Башҡортостан Республи­каһы Хөкүмәте Премьер-министры урынбаҫары - Башҡортостан Респу­бликаһының сәнәғәт, энергетика һәм инновациялар министры Александр Шельдяев, район хакимиәте башлығы Әлфир Сабиров һәм башҡа мәртәбәле ҡунаҡтар ҡатнашты. Улар байрам са­раһына килгәндәрҙең барыһына ла иң изге теләктәрен юлланы.

Ғүмерҙәрен аямайынса Тыуған ил өсөн батырҙарса һәләк булған яу­гирҙәрҙе лә онотманыҡ был көндө - районыбыҙҙың бер нисә мәктәбендә улар иҫтәлегенә мемориаль таҡталар асылды.

Ҡырмыҫҡалының 2-се мәктәбен­дә ҡасандыр ошо уҡыу йортонда бе­лем алған, махсус хәрби операцияла һәләк булған Айрат Ғилемшин, Эрик Ҡужин, Руслан Сөләймәнов, Рәфис Талхин, Максим Багавеевҡа һәм Тө­ньяҡ Кавказдың ҡыҙыу нөктәһендә баштарын һалған Айрат Хөсәйенов менән Валерий Вәхитовҡа арналған хәтер таҡталары асылды.

Ефремкин мәктәбендә махсус хәрби операцияла ҡатнашыусы Алек­сей Михайлов, Владимир Емельянов, Игорь Ивановҡа, Чечен һәм Афған­стан һуғыштарында һәләк булған Эду­ард Афанасьев менән Иван Никитин­дарҙың иҫтәлеген мәңгеләштерҙеләр.

Махсус хәрби операция зонаһында батырҙарса һәләк булған Андрей Ка­сьянов һәм Салауат Мөхәмәтйәновҡа Иҫке Бәпес һәм Бишауыл-Уңғар мәк­тәптәрендә мемориаль таҡталар ҡуй­ылды.

- Был һәйкәлдәр Ватаныбыҙ һағында тороусы батыр яугирҙәрҙең иҫтәлеген мәңгеләштерәсәк һәм йәш быуын өсөн илһөйәрлек өлгөһө булып торасаҡ, - тинеләр был турала сығыш яһаусыларҙың барыһы ла.

Бына шулай, бер аҙ моңһоу ҙа, шул уҡ ваҡытта шатлыҡлы ла мәлдәр ки­серҙе районыбыҙ халҡы Белем көнөндә.

Розалия БИКТИМЕРОВА.

Автор фотолары.