Лайыҡлы хөрмәт ҡаҙана

Лайыҡлы хөрмәт ҡаҙана

Бар ғүмерҙәрен уҡытыусылыҡ хеҙмәтенә, балалар тәрбиәләүгә бағышлаған кешеләр менән һоҡланмау мөмкин түгел. Улар барыбыҙ өсөн дә аҡыл һәм сабырлыҡ өлгөһө булып тора.

Ҡабаҡ ауылында йәшәүсе педагогик хеҙмәт ве­тераны Хызыр Абдрахманов та ярты ғүмерен ошо изге эшкә бәйләгән. Ул үҙенең хеҙмәт юлын 1960 йылда Белорет районының Ғәбдүк ауылының һигеҙ йыллыҡ мәктәбендә математика һәм физика уҡы­тыусыһы булараҡ башлай. Шул уҡ ваҡытта ситтән тороп Стәрлетамаҡ педагогия институтының физи­ка һәм математика факультетында юғары белем ала.

1978 йылда Хызыр Абдулла улы Ҡырмыҫҡалы районының Ҡабаҡ һигеҙ йыллыҡ мәктәбенә ди­ректор итеп тәғәйенләнә. Бар ғүмерен мәғариф өл­кәһенә арнаған уҡытыусы тәүге көндәрҙән үк гра­моталы һәм перспективалы белгес булараҡ ҡына түгел, ә шулай уҡ һәләтле ойоштороусы булыуы һәм һәр эшкә яуаплы ҡарауы менән таныла. Уның бар­лыҡ ошо һыҙаттары хеҙмәттәштәренең хөрмәтен һәм абруйын яуларға булышлыҡ итә.

Директор булып эшләү осоронда татыу һәм ижа­ди ҡарашлы педагогик коллектив туплауға ирешә, мәктәптең матди-техник базаһын йыһазландырыу өсөн күп көс түгә, спорт майҙансығы эшен яйға һала һәм спорт инвентары менән тәьмин итә. Шу­лай уҡ был дәүерҙә мәктәп Ҡабаҡ кирбес заводы һәм башҡа предприятиелар менән уңышлы хеҙмәт­тәшлек итә башлай. Ул Ҡабаҡ ауылының 2-се мәк­тәбе төҙөлөүгә ҙур өлөш индерә һәм бындағы пе­дагогик коллективты етәкләй. Яңы мәктәпте лә кәрәкле әсбаптар һәм дәреслектәр менән тәьмин итә, хеҙмәткә өйрәтеү кабинетын һәм спорт за­лын йыһазландыра, уҡыусыларҙы йылы аш менән туҡландырыу шарттарын булдыра. Шул уҡ ваҡытта коллективҡа талантлы уҡытыусыларҙы йәлеп итеү эшен дә оҫта башҡара. Бихисап уҡыусыларҙың рай­он һәм республика кимәлендә яҡшы һөҙөмтәләр күрһәтеүе лә был турала күпте һөйләй.

Хызыр Абдулла улы Ҡабаҡ ауылының 2-се мәк­тәбе директоры вазифаһында 16 йыл хеҙмәт итә һәм, артабан, хаҡлы ялға сыҡҡансы, математика уҡытыусыһы булараҡ эшен дауам итә. Үҙенең 47 йыллыҡ хеҙмәт стажының 41 йылын ул мәғариф өл­кәһенә бағышлай.

Хызыр Абдрахманов тормош иптәше Сидиҡа Нәбиулла ҡыҙы менән 55 йыл бәхетле тормош ки­серә һәм улар өс улға ғүмер бүләк итәләр. Әлеге көндә барлыҡ балалары ла үҙ тормоштары менән йәшәй, ә бәхетле олатай менән өләсәй алты ей­ән-ейәнсәрен тәрбиәләүҙә әүҙем ярҙам күрһәтә. Абдрахмановтарҙың бер улдары – Вәли Хызыр улы -техник фәндәр кандидаты, Өфө фән һәм техно­логиялар университетында уҡыта. Хызыр Абдулла улы ейәндәренә уҡыуҙарында ғына ярҙамлашып ҡалмай, ә улар менән бергә саңғыла йөрөргә, спорт менән шөғөлләнергә лә өлгөрә. Оло йәштә булыуы­на ҡарамаҫтан ул үҙе лә әүҙем һәм сәләмәт тормош алып бара, Ҡабаҡ ауылында үткән саңғы ярышта­рында ҡатнашып, призлы урындар ала.

Мәғариф ветераны хаҡлы ялда ла тик ятмай, ул үҙенең яратҡан шөғөлө – умартасылыҡ эшен йәйеп ебәрә. Уның умарталығынан алынған бал иң тәм­леһе тиҙәр яҡташтары.

Әлегә тиклем элекке хеҙмәттәштәренең һәм уҡыусыларының, шулай уҡ ауылдаштарының лай­ыҡлы хөрмәтен ҡаҙанған уҡытыусының тормош тә­жрибәһе бар кешегә лә өлгө булып торорлоҡ.

Миләүшә КҮСӘБАЕВА.

Ҡабаҡ ауылы.