Бала саҡ хыялын тормошҡа ашырған

Бала саҡ хыялын тормошҡа ашырған

Уҡытыусы һәм остаз йылы сиктәрендә бар ғүмерен балаларға белем биреүгә арнаған мөғәллимдәр тураһында бәйән итеүебеҙҙе дауам итәбеҙ.

Иҫке Бәпес ауылында йәшәүсе Ру­зилә Хафизова ла тәүге уҡытыусыһы­ның: “Һин уҡытыусы булырһың ул”, - тигән һүҙҙәрен мәңгелеккә күңеленә һеңдереп, ошо һөнәрҙе үҙләштерә һәм хаҡлы ялға сыҡҡансы ауыл мәк­тәбендә балаларға белем бирә.

- Беренсе класҡа барғас та, киләсәктә уҡытыусы булырға хыял­лана башланым. Беҙҙе башланғыс класта ир уҡытыусы уҡытты. Мәк­тәпкә барғансы уҡ уҡырға ла, яҙы­рға ла белә инем. Шуға күрә мин күбеһенсә уҡытыусы абыйға ярҙам иттем. Уҡый-яҙа белмәгән уҡыусы­ларҙың һәр береһе эргәһендә берәр ай ултырып, туғыҙ ай эсендә туғыҙ баланы уҡырға һәм яҙырға өйрәттем. Уҡытыусы абый шул саҡта уҡ: “Хафи­зова, һин уҡытыусы булырһың ул”, - тигәйне. Шул һүҙ башыма ныҡ итеп һеңеп ҡалды. Шулай уҡ бала саҡта гел генә уҡытыусы булып уйнаныҡ. Һигеҙенсе класты тамамлағас, күп тә уйлап тормай педагогия училищеһы­на уҡырға индем. Әсәйем дә ҡаршы булманы, - ти ул үҙенең бала саҡ хы­ялы тураһында.

Рузилә Нәсих ҡыҙы Бәләбәй пе­дагогия училищеһын тамамлағас, үҙенең тыуған яҡтарында – Баҡалы районында эш башлай һәм юғары бе­лем алыу маҡсатында Башҡорт дәүләт университетының тарих факультеты­на ситтән тороп уҡырға инә. Йәш белгестең ҡалала йәшәү һәм эшләү теләге ҙур була. Шуға күрә ул Өфө ҡалаһына күсеп килеп, балалар баҡ­саһына тәрбиәсе булып эшкә урын­лаша.

Буласаҡ тормош иптәше, ул саҡта ҡала автобусында водитель булып эшләп йөрөгән Үрге Төкөн ауылы егете Фәнис Көҫәпҡолов менән дә уларҙы тап Өфө ҡалаһы танышты­ра һәм ҡауыштыра. Бер-береһен тәү күреүҙән оҡшатҡан йәштәр бер нисә айҙан өйләнешәләр һәм Фәнис Мортаза улының тыуған районына ҡайтып төпләнергә ҡарар итәләр. Рузилә Нәсих ҡыҙын мәғариф бүле­ге Иҫке Бәпес ауылына тарих уҡыты­усыһы итеп эшкә йүнәлтә һәм улар ғаилә тормошон ошо ауылда башлап ебәрәләр. Рузилә Нәсих ҡыҙы хаҡлы ялға сыҡҡансы башланғыс кластар һәм тарих уҡытыусыһы була.

Тормош иптәше Фәнис Морта­за улы иһә күп йылдар Иҫке Бәпес ауылында водитель булып эшләй. Гармун-баянда өҙҙөрөп уйнаған, үҙе йырҙар ижад иткән моңло кеше бу­лараҡ ул, колхоз бөткәс, баш көллө мәҙәниәт усағы эшенә сума. Төрлө кимәлдәге музыкаль конкурстарҙа ҡатнашып, призлы урындар яулауға ла ирешә. Әле хаҡлы ялда булһа ла, һәр ваҡыт мәҙәни байрамдарҙың ур­таһында ҡайнай ул.

Көҫәпҡоловтарҙың ике балалары ла әсәләре юлынан китә. Ҡыҙҙары Гөлшат Сәғәҙиева Ҡырмыҫҡалы гим­назияһында математика һәм инфор­матика фәндәренән уҡыта. Улдары Фәнзил дә бер нисә йыл Ҡырмыҫҡа­лының С.М. Чугункин исемендәге мәктәбендә математика уҡытыусыһы булып эшләй. Шул уҡ ваҡытта ул за­ман талаптарына яраҡлашып, про­граммист һөнәрен үҙләштерә һәм әлеге көндә ошо йүнәлештә уңышлы хеҙмәт итә. Шулай итеп, ғаиләлә бар­лығы өс уҡытыусы.

Әйткәндәй, Рузилә Нәсих ҡыҙы­ның һеңлеһе лә, ҡәйнәһе Ләй­лә Ғилметдин ҡыҙы ла ғүмерҙәрен мөғәллимлек эшенә бағышлағандар. Көҫәпҡоловтарҙың өс ейән-ейән­сәре лә киләсәктә, бәлки, иң изге һөнәрҙәрҙең береһе булған уҡытыусы һөнәрен һайлар тип ышанайыҡ.

Шуны ла әйтергә кәрәк: Рузилә Нәсих ҡыҙы хаҡлы йылға сыҡҡан­дан һуң, күптәнге хыялын тормошҡа ашырып, ныҡлап дин юлына баҫа. Уның дин ҡанундары менән тығыҙ бәйләнгән бөгөнгө йәшәйешендә лә тик уңыштар ғына юлдаш булһын тип теләйек.

Розалия БИКТИМЕРОВА.