Тик алға табан

Нисәмә быуын уҡытыусыларҙың изге фиҙаҡәр хеҙмәте ошо мәктәп менән бәй­ләнгән. Бишауыл-Уңғар мәктәбенең дан­лы тарихи йылъяҙмаһы бөгөн дә ышаныслы ҡулдарҙа дауам итә. Ҡырыҫ заман елдәренең шауҡымы филиалға әйләндереп ҡуйыуына ҡарамаҫтан, мәктәп уҡытыусылары база мәктәптәренән һис кенә лә ҡалышмайынса белем һәм тәрбиә биреүҙә ең һыҙғанып эшләй. Уҡыусылар һаны ла тотороҡло һаҡлана (йыл һайын 100-гә яҡын). Төрлө фәндәр буйынса олимпиадалар, ғилми-ғәмәли кон­ференциялар, спорт ярыштары булһынмы, уҡыусыларыбыҙ һис кенә лә һынатмай. Был хаҡта бихисап Маҡтау ҡағыҙҙары, Рәхмәт хаттары һөйләй. Белем һәм тәрбиә биреүҙә заман менән бергә атлап, уҡытыуҙың төрлө яңы алымдарын тиҙ арала үҙләштереп, шуларҙы үҙ эшендә ҡулланып, уңыштарға өлгәшеүсе белемле, үҙ һөнәренә ысын мәғәнәһендә ғашиҡ уҡытыусылары менән көслө мәктәбебеҙ бөгөн дә. Улар татыу бер ғаилә булып, үҙ-ара килешеп, ярҙамлашып хеҙмәт иткәнгә күрә лә ниндәй генә киҫкен мәлдәрҙә лә юғалып ҡалмайынса, барлыҡ һынауҙарҙы еңеп, йырып сығырға һәләтле. Тормош ысын­барлығы быны даими рәүештә раҫлап тора. Шөкөр, Бишауыл-Уңғар мәктәбе ғүмер-ғүмергә белемле, һәләтле, тупланған уҡы­тыусылар коллективы менән көслө булды. Был ойоштороусы булараҡ, етәксегә лә бәйләнгән. Ошо яҡтан мәктәп директоры Рәсәй Федерацияһының Маҡтаулы дөйөм белем биреү хеҙмәткәре Ильяс Миңлебай улы Вәлиевтың хеҙмәттәрен телгә алмау мөмкин түгел. Быйылғы уҡыу йылын 37-се йыл директор булып ҡаршылай (юридик яҡтан мөдир булһа ла, директор тип әйтмә­йенсә булдыра алмайым. Уның яуаплылығы һис кенә лә директорҙарҙан кәм түгел. Артығыраҡ булмаһа әле). Юғары мәҙәниәт­ле, ипле, кешелекле, изгелекле булыуы менән оҙаҡ йылдар етәксе йөгөн ышаныслы тартып, уҡытыусыларҙың да, уҡыусы­лар­ҙың­ да ихтирамын яуланы һәм яулай ул. Мәктәптең өлгәшкән уңыш­тарында, яула­ған үрҙәрендә Ильяс Миң­лебай улы­ның лайыҡлы өлөшө бар. Уҡыу-уҡытыу, тәрбиә процесына даими контроль, кәрәк саҡта уҡытыусыларға методик ярҙам күрһәтеү ҙә яуаплы эш. Быны директорҙың уҡытыу-тәрбиә эштәре буйынса урынба­ҫары рус теле һәм әҙәбиәте уҡытыусыһы Ғәлиә Раил ҡыҙы Вәлиева яуаплылыҡ тойоп, еренә еткереп башҡара. Һәр кем ме­нән уртаҡ тел табып, килеп тыуған проб­лемалы мәсьә­ләләрҙе килешеп хәл итә алыуы арҡаһында ул хеҙмәттәштәре араһында абруйлы.

(Дауамын гәзиттән уҡығыҙ)

Рим Исхаҡов, Рәсәй Федерацияһының мәғариф алдынғыһы, Мөхәмәтсәлим Өмөтбаев исемендәге премия лауреаты.