Еңеүсе ғаиләләр билдәләнде

 -Ғаилә – һәр кем өсөн ҡәлғә, бәләкәй генә бер донъя ул. Балаларҙы һөйөүгә, наҙға сорнап, уларға аҡыллы кәңәштәр биреп, эшкә өйрәтеп, хәүеф-ха­фанан ҡурсалап, үрнәк булып тороусы ғаиләләр районыбыҙҙа бихисап. Тап бына ошондай ғаиләләр конкурста әүҙем ҡатна­штылар һәм улар менән бөгөн яҡындан таныша­саҡбыҙ, -тигән һүҙҙәр менән асты сараны алып барыусылар. Еңеүселәрҙе тәбрикләү өсөн һүҙ район хакимиәтенең йәштәр сәйәсәте, физик культура һәм спорт буйынса бүлеге­нең баш белгесе Виктория Истратоваға бирелде.

-Мөхәббәт һәм бер-бе­реңә ярҙам итеү ғаилә өсөн иң мөһиме булыуын бө­гөнгө сарала иҫбат итәбеҙ. Беҙҙең районда бер-бе­реһе өсөн өҙөлөп торған ошондай матур ғаиләләр булыуы ҡыуаныслы, -тине Виктория Владимировна һәм биш төп номинация еңеүселәрен бүләкләне.

“Күп балалы ғаилә” номинацияһында Ҡыр­мыҫҡалынан Рауза һәм Илдар Сафин-Таһировтар еңеү яуланы. Был ғаилә 2009 йылда барлыҡҡа кил­гән. Улар тәүге көндәрҙән үк күп балалы һәм татыу ғаилә булдырырға хыялла­налар һәм ошо хыялдарын тормошҡа ашыралар.

“Ватанды һаҡлаусы ғаиләһе” номинацияһын­да Сихонкин ауылынан Трофимовтар һәм При­бельскийҙан Абросимо­втар ғаиләләре билдәлән­де.

-Беҙҙең атай-олатайҙар Бөйөк Ватан һуғышында ҡатнашҡандар. Ә бөгөн иһә беҙҙең ҡәҙерле кеше­беҙ, атайыбыҙ махсус хәр­би операция биләмәһен­дә илебеҙ тыныслығын һаҡлай. Беҙ уның менән ғорурланабыҙ. Ул – Вата­ныбыҙҙың ысын һаҡсыһы, ә беҙ – Ватан һаҡсыһы ғаиләһе, -тиҙәр Аброси­мовтар бер тауыштан.

“Ауыл ғаиләһе” но­минацияһында Үтәгән ауылынан Селина һәм Динар Батталовтар һәм Прибельскийҙан Эльви­ра һәм Олег Матросовтар ғаиләләре алдынғылар рә­тендә.

“Ғаилә – ғөрөф-ғәҙҙәттәрҙе һаҡлаусы” но­минацияһында Ҡарлы­ман ауылынан Динара һәм Рөстәм Абакачевтар еңеүсе тип танылды.

Һалйығот ауылынан Надежда һәм Фидаиль Фәйзуллиндар “Алтын ғаилә” номинацияһына эйә булды.

Районыбыҙҙың был матур ғаиләләренең ба­рыһы ла үҙҙәренең ты­рышлығы, уңғанлығы, берҙәм булыуы менән һоҡландыра. Уларҙың бәхетле булыуҙары, тор­мошто һөйөүҙәре, барлыҡ эске донъялары йөҙҙәрен­дә һәм күҙҙәрендә сағыла.

Үтәгән ауылында йәшәүсе өс балалы Баттало­втар ғаиләһенең тамырҙары академик Ғайса Хөсәйенов, данлыҡлы сөгөлдөрсө һәм башҡорт ҡатын-ҡыҙҙар араһынан беренсе Социалистик Хеҙмәт Геройы исемен яулаусы Банат Батырова, БАССР-ҙың халыҡ артисы Әхәт Хөсәйеновтарға ба­рып тоташа.

-Ғаиләбеҙ менән бер­гә бейергә, йырларға һәм ҡурайҙа уйнарға яратабыҙ. Төрлө сараларҙа әүҙем ҡатнашабыҙ, -тиҙәр Бат­таловтар.

Еңеүсе ғаиләләр өсөн был көндө Елена Хәби­буллина етәкселегендәге “Виват” ансамбле, Мар­сель Алдаҡаев, Дамир Ишембаев башҡарыуында йырҙар яңғыраны. Сара­ла ҡатнашыусылар уларға ҡушылып йырланылар ҙа, дәртле бейеүгә лә төшөп киттеләр һәм ошо йәм­ле көндө хәтерҙә оҙаҡҡа һаҡлар өсөн күмәкләшеп иҫтәлеккә фотоға төшөргә лә онотманылар.

Розалия НАЗАРОВА.

Автор фотоһы.