Рухландырҙы шиғриәт байрамы

Шиғриәт байрамын асыу өсөн һүҙ гә­зитебеҙҙең баш мөхәррире Гөлсәсәк Ала­соваға бирелде.

- “Халҡым теле – хаҡлыҡ теле” он­лайн конкурсында ҡатнашыусы 30-ҙан ашыу конкурсанттар араһында махсус хәрби операцияла ҡатнашыусы Мөкәй ауылынан Линар Хәмитовтың да видео­яҙмаһы булыуы бәйгебеҙгә оло мәртәбә өҫтәне. Яугир егеттең туған телгә булған һөйөүен, тыуған яғын һағыныуын сағыл­дырған видеояҙма өсөн Мөкәй ауылы клубының мәҙәни ойоштороусыһы Гүзәл Сыңғыҙоваға сикһеҙ рәхмәтлебеҙ. Киләсәктә илебеҙҙә тыныслыҡ урын­лашып, Линарҙың үҙенең ошондай сара­ларҙа шәхси ҡатнашыуын көтөп ҡалабыҙ. Башҡорт телен һаҡлауға һәм үҫтереүгә арналған конкурста төрлө йәштәге кон­курсанттар ҡатнашыуы ҡыуаныслы, - тип бәйгеселәрҙең барыһына ла уңыштар теләгәс, Гөлсәсәк Сәлих ҡыҙы конкурсты ойоштороуҙа оло ярҙам күрһәтеүсе, дипломдар һәм бүләктәр менән тәьмин итеүсе “Стендмастер” йәмғиәте дирек­торы Радмир Исламовҡа туған телебеҙҙе пропагандалауҙа һәм әҙәби мираҫты һаҡлауҙа өлөш индергәне, башҡорт те­ленә һөйөү тәрбиәләгәне өсөн Рәхмәт хаты тапшырҙы.

- Шиғриәт һөйөүселәрҙе берләште­реүсе ошондай матур конкурстар ойошторғандары, балалар менән бергә оло­ларҙы, ата-әсәләрҙе йәлеп иткәндәре өсөн “Даирә” гәзите редакцияһына рәхмәт. Күңелдәргә илһам бирә торған эстәлекле байрамдар һәр ваҡыт булып торһон, ижадсыларға ижади уңыштар юлдаш булһын, илһам шишмәләре урғылып торһон, юғалмаһын, шиғриәт­те яратырға, күберәк китаптар уҡырға өндәһен. Киләсәктә бындай бәйгеләрҙә ҡатнашыусылар тағы ла күберәк, әүҙе­мерәк булһын, - тигән теләктәрен еткерҙе байрамыбыҙ ҡунағы Фәрғәт Ҡотлобаев.

Бишауыл-Уңғар мәктәбенең башҡорт теле һәм әҙәбиәте уҡытыусыһы Рим Исхаҡов та сарала ҡатнашыусыларҙы сәләмләп:

- Матур шиғырҙар уҡыған, һөйләгән кеше үҙе лә матур була. Уларҙың хәтере лә яҡшы, кеше менән матур итеп арала­ша ла беләләр. Улар матурлыҡты башҡа­ларға ҡарағанда нығыраҡ күрә белеү, тор­мошто икенсерәк күҙлектән ҡарай белеү һәләтенә эйә. Шиғри күңелле кешеләр беҙҙең арала күберәк булһын, шиғыр һы­маҡ тормошобоҙ ҙа матур булһын. Иң мөһиме, донъяларыбыҙ имен булһын, шул саҡта шиғыр һөйләүсе дуҫтарыбыҙ ҙа артҡандан-артасаҡ. Балалар, йәштәр һәм ололар өсөн шунда йәмле саралар ойоштороусы үҙебеҙҙең “Даирә” гәзи­те хеҙмәткәрҙәренә ҙур рәхмәт, - тигән һүҙҙәрен еткерҙе.

- Матур күңелле, рухлылар, талантлы­лар йыйылған бөгөн. Шиғриәт – ул ма­турлыҡ донъяһы. Тик бай, матур күңелле кешеләр генә шиғыр ярата. Тимәк бын­да бөтәгеҙ ҙә матурҙар, уңғандар, ты­рыштар, көслөләр. Шиғырҙың бер тәмен белгән кешеләр унан бүтән айырыла алмайҙыр, тип уйлайым. Сөнки ул ке­шене арбай, үҙенә ылыҡтыра һәм кеше үҙе лә һиҙмәҫтән шиғриәт донъяһына сума. Шиғыр – ул яратҡан ризыҡ кеүек. Уны теләп кенә, һорап ҡына тора күңел. Айырыуса бөгөн оло рәхмәтте байрам­дың иғәнәсеһе Радмир Исламовҡа әйт­ке килә. Йәштәрҙе үҫтереүҙә ныҡ ярҙам күрһәтеүсе, туған телде үҫтереүгә ҙур өлөш индереүсе һеҙҙең кеүек кешеләр күберәк булһын ине, - тине талантлы шағирә, яҡташыбыҙ Фирүзә Абдуллина һәм үҙенең шиғри күстәнәсен бүләк итте.

- Ошондай сарала ҡатнашыуыма бик шатмын. Декабрҙә үткән ҡоролтай йыйылышында беҙгә телебеҙҙе, мәҙә­ниәтебеҙҙе һаҡлау бурысы ҡуйылды. Шу­ның өсөн мин дә ошо эшкә үҙ өлөшөмдө индерергә ҡарар иттем һәм район ҡо­ролтайы ағзалары, “Даирә”ләр менән бергә шиғриәт конкурсы үткәрергә ниәт­ләнек, - тине Радмир Рәжәп улы үҙенең сығышында.

Шиғриәт көнөндә уҙғарылған мәртәбәле сарабыҙ махсус хәрби операцияла ҡатнашыусы яҡташыбыҙ Линар Хәми­товтың күңелдәргә үтеп инерлек видеосәләменән башланды.

- Ҡыҙғанысҡа ҡаршы, әлеге ваҡытта мин һеҙҙең менән бергә була алмайым. Шуға күрә видеосәләм генә ебәрәм. Ал­лаһ бирһә, киләсәктә осрашырбыҙ тип уйлайым, - тип беҙгә үҙенең һағыныш­лы ҡайнар сәләмдәрен күндергәс, Линар М. Аҡмулланың “Башҡорттарым, уҡыу кәрәк!” шиғырын һөйләне.

Бәйгеселәр был көндө туған тел, махсус хәрби операция, Бөйөк Ватан һуғышы темаһына арналған күңелдәрҙе тетрәндерерлек, уйланырға мәжбүр итер­лек шиғырҙар һөйләне.

Жюри ағзалары кәңәшләшкән арала Рим Риф улы һәм Фәрғәт Фәрит улы ла күңелдәренән урғылып сыҡҡан шиғырҙарын һөйләп ишеттерҙе.

Шиғриәт көнөндә уҙғарылған шиғри кисәлә күңел ҡылдарын тирбәтерлек сығыштары менән әсир итеүселәр – иң кескәй конкурсантыбыҙ, Ҡырмыҫҡа­лынан Морат Хөсәйенов, уҡыусылар араһында – Ефремкиндан Полина Па­ламарчук (етәксеһе Лилиә Юлдашбае­ва), Иҫке Бәпестән Фидәлиә Ирмәкова менән Динислам Яҡупов (етәкселәре Ләйсән Абдуллина), Мөкәйҙән Рәзиф Хәмитов (етәксеһе Фәниә Ишҡарина), Бишауыл-Уңғарҙан Гөлшат Мөхәмәтши­на менән Милана Меркулова (етәкселәре Рәмилә Исхаҡова), Ҡырмыҫҡалынан Әлиә Ғирфанова (етәксеһе Ләйлә Ғафа­рова), Үрге Төкөндән Инсаф Хәмитов, өлкәндәр араһында – Мөкәйҙән Зөлфиә һәм Файза Дәүләтбаевалар (ойоштороу­сылары - Гүзәл Сыңғыҙова), Үрге Төкөн­дән Айгөл Хәмитова менән Райхана Сурбаева, Иҫке Бәпестән Гөлнур Шай­марҙанова дипломдарға һәм иҫтәлекле бүләктәргә эйә булды.

Байрам кисәһен алып барыусы Флүрә Низамоваға, тауыш режиссеры Филүс Шәңгәрәевҡа, йырсы Марсель Алдаҡа­евҡа, мәртәбәле ҡунаҡтарыбыҙға, бар­лыҡ ҡатнашыусыларға һәм уларҙың етәкселәренә оло рәхмәт белдерәбеҙ һәм киләһе бәйгеләрҙә лә әүҙем ҡатнашы­уығыҙҙы көтөп ҡалабыҙ.

Розалия НАЗАРОВА.

Фирүзә РӘХМӘТУЛЛИНА фотолары.