Ҡатнашығыҙ һәм еңегеҙ!

“Ем-ем итә шыршыҡай”
Был бәйге сиктәрендә төрлө материалдарҙан шыршы уйынсыҡтары яһарға тәҡдим итәбеҙ. Конкурсҡа йомғаҡ яһағанда балаларҙың һәм ололарҙың эштәре айырым баһаланасаҡ.

“Кем һин, серле ҡомаҡ?”
Көнсығыш календары буйынса, 2020 йылдың символы – аҡ тимер ҡомаҡ. Йондоҙнамә буйынса нәҡ ошо йылда тыуған таныштарығыҙ бармы? Улар ниндәй сифаттарға эйә? Был турала мәҡәләләр яҙып ебәрегеҙ.

“Их, быймаһы ла быймаһы!”
Ниндәй ҡыш быймаһыҙ булһын инде? Уларҙы ҡупшы итеп биҙәүселәр ҙә юҡ түгел. Был бәйгебеҙ ижади ҡарашлы оҫталарға ҡағыла. Матур итеп биҙәлгән быйма­лары­ғыҙҙың фотоларын көтәбеҙ.

“Йылдар үткәс”
Һәр өйҙә, моғайын, балалар, дуҫтар, класташтар менән бергә Яңы йылды ҡаршылағанда төшкән, бәхетле миҙ­гелдәр, яңы йыл кәйефе сағылған фотоһүрәттәр һаҡ­лана­лыр. Үткәндәргә ҡайтып булмай, әммә иҫке фотоһүрәттең сюжетын булдырып ҡарарға мөмкин! Фотоконкурстың шарты шундай – ошо фотоһүрәттәге кешеләр йыйылып, нәҡ элекке кеүек итеп фотоға төшөргә тейеш. Оригиналлек, юмористик ҡараш, оригиналға максималь оҡшашлыҡ хуплана.

“Әкиәт тылсымы”
Тағы ла бер ҡыҙыҡлы, ижадик бәйгелә бар ғаиләгеҙ менән ҡатнаша алаһығыҙ. Был конкурста ихаталарын, йә булмаһа тәҙрәләрен, балкондарын, подъездарын иң оҫта биҙәүселәрҙе асыҡлаясаҡбыҙ.