Балалы ғаиләләргә ярҙам күрһәтелә

 Балалы ғаиләләрҙә килеп тыуған күп проблемаларҙы хәл итеүҙә ҙур терәк булып торған ойошмала социаль посо­биелар юллау, балаларҙы балалар баҡ­саһына йәки мәктәпкә урынлаштырыу, медицина комиссияһы үтеү һәм башҡа шуның кеүек мәсьәләләрҙе сисеү буй­ынса оло эштәр башҡарыла.

- Айына ике тапҡыр “Ғаилә техно­логиялары”, “Яңы тормош”, “Ғаилә ғаиләгә ярҙам итә” тигән темалар буй­ынса Ғаилә клубтары ойошторабыҙ. “Яңы тормош” тип аталған осрашыуҙарҙа туғандары, яҡындары махсус хәр­би операцияла ҡатнашҡан ғаиләләр менән әңгәмәләшәбеҙ. Әлеге көндә беҙҙең белгестәр районда көн итеүсе 56 ғаиләгә социаль ярҙам күрһәтә. Улар араһындағы өс ғаиләлә атайҙар мах­сус хәрби операция зонаһында. Ай­ҙың һуңғы шәмбеһендә уҙғарылған “Ғаилә ялдары” сиктәрендә февралдә “Айыҡ ауыл” республика конкурсы­на арнап, Күлләр ауылы балалары һәм ата-әсәләре менән осраштыҡ, апрелдә берҙәм дәүләт имтихандарына әҙерлек буйынса һөйләштек.

Районда үткәрелгән төп һәм ҙур са­раларҙың һәр береһендә әүҙем ҡатна­шабыҙ, төрлө яҡлап ярҙам күрһәтәбеҙ. Мәҫәлән, 8 Март байрам сараһын беҙ визажист һәм парикмахер менән тәь­мин иттек. Унда шулай уҡ үҙебеҙҙең психолог тестар үткәрҙе һәм ата-әсәләр менән әңгәмәләште, ә юрист һора­уҙарға яуап бирҙе. Күптән түгел үт­кән “Балалар һабантуйы”нда оҫталыҡ дәрестәре күрһәттек.

Ғөмүмән әйткәндә, беҙҙең һәр эш балалы ғаиләләргә ярҙам итеү менән бәйле. Даими рәүештә бәлиғ бул­мағандар эше буйынса уҙғарылған ко­миссияларҙа ла ҡатнашырға тура килә. Спиртлы эсемлектәр менән мауыҡҡан, балаларына тейешле иғтибар бирмәгән һәм башҡа ошондай тәртипһеҙ тор­мош рәүеше алып барған ата-әсәләрҙе ыңғай юлға баҫтырыр өсөн бар көстө һалабыҙ һәм уларҙы нисек тә булһа ата-әсәлек хоҡуғынан мәхрүм итмәҫкә тырышабыҙ. Ҡайһы бер ата-әсәләрҙең үҙҙәрен ҡулға алып, яҡшы яҡҡа үҙ­гәреүе ҡыуаныслы, әлбиттә.

Өфөнөң реабилитация үҙәге “Таян – опора” проекты сиктәрендә өс тапҡыр килеп, инвалид балаларға меди­цина ярҙамы күрһәтте, дауалау физ­культураһы үткәрҙеләр, белгестәр кәңәштәр бирҙеләр. Улар менән арта­бан да хеҙмәттәшлек итергә уйлайбыҙ.

Йәйге каникулдарҙы әүҙем һәм ҡыҙыҡлы үткәреү өсөн Күп функци­ялы үҙәктә райондың барлыҡ бел­гестәре менән «Файҙалы осрашыуҙар марафоны» үткәрелде. Унда ата-әсәләргә каникулдарҙа балалар өсөн ниндәй түңәрәктәр, секциялар эшләүе тураһында мәғлүмәт бирелде. Халыҡ-ара балаларҙы яҡлау көнөндә быйыл да бер йәшкә тиклемге сабый­ҙарҙың ярышын ойоштормаҡсыбыҙ.

Балалар – беҙҙең киләсәк тигән­де беребеҙгә лә оноторға ярамай һәм уларҙың киләсәге яҡты булһын өсөн ҙур тырышлыҡ һалырға кәрәк.

Ауыр хәлгә тарыған, ниндәйҙер хәл итә алмаҫтай тойолған проблемала­ры килеп тыуған ғаиләләр һәр ваҡыт беҙҙең “Ғаилә” хеҙмәтенә мөрәжәғәт итә ала.

Төрлө байрамдарға бүләктәр, мәктәп кәрәк-яраҡтары алыу өсөн иғәнәселек ярҙамы күрһәтеүселәргә рәхмәтлебеҙ. Был яҡтан беҙгә район хакимиәте, “Петон” нефть һәм газ ғил­ми-тикшеренеү проекты институты” йәмғиәте, “Газпром трансгаз” йәмғиә­тенең Ҡырмыҫҡалы идаралығы, Үҙәк район дауаханаһы һәм башҡалар оло ярҙам күрһәтә. Барлыҡ райондаштарҙы 16 майҙан алып 16 июнгә тиклем дау­ам иткән «Ғаиләнең изгелек бумеран­гы» акцияһына ҡушылырға саҡыра­быҙ. Был акция сиктәрендә һәр кеше үҙҙәренең әйберҙәрен башҡа ғаиләләр менән бүлешә ала. Яңы һәм ҡулланыуҙа булған балалар йыһазы, коляска­лар, саналар, велосипедтар, баланы һикертеү, йөрөтөү өсөн яйланмалар, ашатыу өсөн ултырғыстар, стерилләү өсөн аппараттар һәм башҡалар ҡабул ителә, - тигән фекерҙәре менән бүлеш­те райондың “Ғаилә” хеҙмәте етәксеһе Эльвира Фәрит ҡыҙы Рәхмәтуллина.

Эйе, шатлыҡ-ҡыуаныстарға тулы бала саҡтан да гүзәл мәл юҡ. Бала саҡты бәхетле итеү – һәр ғаиләнең, йәмғиәттең һәм дәүләттең бурысы. Балалыҡты дәүләт һәм йәмғиәт ыша­ныслы яҡлай.