2 августа Иглин районында булған үлемесле авария тураһында хәбәр иткәйнек. Һамар – Өфө – Силәбе трассаһының 1546-сы километрында "Renault Kaptur" машинаһы тәүҙә ҡаршы һыҙаттан килгән "Man" йөк машинаһына бәрелә, аҙаҡ, шулай уҡ ҡаршы һыҙаттан килгән "Lifan Solano" менән төкөшә. Һөҙөмтә аяныслы: бәрелештән һуң икенсе еңел автомобиль водителе урында һәләк була, биш кеше, шул иҫәптән өс бала төрлө йәрәхәттәр ала.

Әле был кешеләрҙең кемлеге асыҡланды. “Лифан”да һәләк булған водитель ҡатын Анастасияға 35 йәш. Артында 12 йәшлек улы менән 10 йәшлек ҡыҙы улырған. Улының башы ныҡ йәрәхәтләнгән, ҡыҙының мейеһе һелкенгән. Әсәйһеҙ ҡалған балалар әле дауаханала. Был ғаилә Нижневартовск ҡалаһында йәшәгән.

“Рено” руле артында ла ҡатын-ҡыҙ ултырған. 52 йәшлек Светлана Өфөнән, ул кондитер булып эшләй. Ҡатындың ун йыллыҡ водителлек стажы бар. Был көндө уның менән бергә машинала 35 йәшлек ҡыҙы һәм 15 йәшлек ейәнсәре китеп барған. Фажиғә көнөндә улар Сатҡы ҡалаһы янында тәбиғәттә ял итеп ҡайтып барған булғандар. Авария мәлендә пассажирҙар йоҡлаған. Һөҙөмтәлә водитель ҡатындың ҡабырғалары һынған, ҡыҙы ҡулын, ейәнсәре аяғын һындырған.

Әле ЮХХДИ был хәл буйынса тикшереү башлаған. Аварияның сәбәптәрен, кемдең ғәйепле булыуын асыҡларға кәрәк. Һәләк булғандарҙың ҡайғыһын уртаҡлашабыҙ, ә ҡалғандарҙы иҫкәртәбеҙ: юл хаталарҙы ғәфү итмәй! Хәүефһеҙлек ҡағиҙәләре тураһында бер ҡасан да оноторға ярамай. 

Фото: "Моя Уфа" порталы. 

Украиналағы махсус хәрби операция барышында Бөрйән районынан өлкән лейтенант Ғәлинур Нурғәле улы Сөләймәнов батырҙарса һәләк булды. Яңыраҡ уны тыуған еренә алып ҡайтып ерләнеләр.

“Бөрйәндәр” социаль төркөмө сәхифәһендә егеттең ата-әсәһе һуңғы кисерештәре менән уртаҡлашҡан. Беҙ уны һеҙгә еткерәбеҙ.

“...Ҡояшлы йәйге матур көн минут эсендә беҙҙең өсөн дөм ҡараңғыға әйләнде – беҙҙе оло ҡайғыларға һалып, Украинала барған махсус операция ваҡытында ҡәҙерле улыбыҙ, өлкән лейтенант Ғәлинур Нурғәле улы Сөләймәнов батырҙарса һәләк булды. 
Ошондай оло ҡайғы менән яңғыҙ ҡалһаҡ, ни эшләр инек? Ярай әле, изге күңелле кешеләр бар. Ауыр ваҡытта беҙгә ярҙам ҡулы һуҙған, һәр яҡтан терәк булырға тырышҡан изге күңелле кешеләргә: ауылдаштарға, күрше-күләнгә, туғандарға, ҡырҙан килеп еткән туғандарға, район, ауыл хакимиәттәре башлыҡтарына, дауахана хеҙмәткәрҙәренә, полиция бүлексәһе, ғәҙәттән тыш хәлдәр министрлығының райондағы бүлексәһе хеҙмәткәрҙәренә, Мәсем клубы, Яңы Мөсәт мәктәбе коллективтарына, ҡатын-ҡыҙҙар, ветерандар советтарына, ҡоҙа-ҡоҙағыйҙарға, Ғәлинурҙың һәм үҙебеҙҙең класташтарға. Ғөмүмән, ҡайғыбыҙҙы уртаҡлашҡан, ҡәҙерлебеҙҙе оҙатышырға килгән, килмәһә лә, күңеле менән беҙҙең янда булған кешеләргә оло рәхмәтебеҙҙе белдерәбеҙ. 

Бала ҡайғыһынан да ауыр ҡайғы юҡтыр... Киләсәктә беребеҙгә лә бындай ҡайғыларҙы күрергә яҙмаһын. Раббыбыҙ барыбыҙға ла именлек, сәләмәтлек, рух ныҡлығы насип итһен. 

Ғәлинурыбыҙ XI кластан һуң Санкт-Петербург ҡалаһындағы Михайлов исемендәге хәрби-артиллерия академияһына уҡырға инеп, уны уңышлы тамамланы. Чечен Республикаһының Урус-Мартан ҡалаһында взвод командиры булып хеҙмәт юлын башланы. Киң күңелле, асыҡ йөҙлө, ихлас күңелле ҡәҙерлебеҙ хеҙмәттәштәре араһында тиҙ арала хөрмәт яуланы. 
Украинала барған махсус хәрби операцияның тәүге көнөндә үк ил алдындағы бурысын намыҫлы үтәне, вәғәҙәһенә тоғро ҡалды. 
Ғәлинурыбыҙҙы ауылдаштарыбыҙ ҙа алсаҡ йөҙлө, кеше менән тиҙ аралашып китеүсән, ярҙамсыл итеп белә. 

Өйләнеп, Шамил исемле улын һөйөргә лә өлгөргәйне. Тик, ҡыҙғанысҡа ҡаршы, ҡыҙы Сафияны күрергә насип булманы – атаһы үлгәндән һуң бер нисә көн үткәс, 1 августа ғына донъяға килде бәләкәсебеҙ. 
Күҙ ҡарабыҙ Ғәлинурыбыҙҙың ятҡан урыны тыныс булһын. 
Һин беҙҙең күңелебеҙ түрендә, ҡәҙерлебеҙ...“ – тип яҙа ата-әсәһе, туғандары.

Ватан өсөн ғүмерен биргән Ғәлинур Сөләймәновтың ата-әсәһенең һәм туғандарының оло ҡайғыһын уртаҡлашабыҙ.

Фото һәм мәғлүмәт сығанағы: https://vk.com/burzyandar.