Ҡыҙғанысҡа ҡаршы, үҙ аллы изоляция осоронда комиссия ағзаларының эше кәмемәй – ултырыштарҙа ата-әсәлек бурыстарын тейешенсә үтәмәгән атай-әсәйҙәргә ҡарата протоколдар тикшерелә. Һүҙ, башлыса, эскелек менән мауыҡҡан ғаиләләр хаҡында бара.
Ҡыҙғанысҡа ҡаршы, балалар араһында урлашыу, бер-береһенә тән йәрәхәттәре һалыу, транспорт сараларын рөхсәтһеҙ алып китеү осраҡтары бар. Уларҙың барыһы ла административ эштәрҙе тикшереү һөҙөмтәләре буйынса яуаплылыҡҡа тарттырыласаҡ.
Хоҡуҡ боҙоуҙарҙы профилактикалау системаһы органдары вәкилдәре, комиссия, опека һәм попечителлек бүлеге, “Ғаилә” район-ара үҙәге белгестәре, хоҡуҡ һаҡлау структуралары хеҙмәткәрҙәре, янғын хәүефһеҙлеге буйынса инспекторҙар һәм ауыл биләмәләре хакимиәттәре белгестәре айырым иғтибар аҫтында булған ғаиләләрҙең йәшәү шарттарын, торлаҡтарын тикшереүҙе дауам итә. Улар күбеһенсә социаль яҡтан хәүефле һәм опекаға алынған балалар тәрбиәләгән ғаиләләр.
Белгестәр рейдтар һөҙөмтәләре буйынса өйҙәренә барғанда балиғ булмағандарҙың дистанцион уҡыуҙарын, атай-әсәйҙәрҙең шулай уҡ үҙ эштәре менән мәшғүл булыуҙарын, аҙыҡ-түлек етерлек булыуын асыҡланы.
Әгәр ҙә һеҙ балиғ булмағандарҙың хоҡуҡтары боҙолоуын йәиһә атай-әсәйҙәрҙең законлы бурыстарын үтәмәгәндәрен күрһәгеҙ, был хаҡта комиссияға 8(34765)2-10-94 телефон һандары буйынса хәбәр итә алаһығыҙ.
Закондарҙы боҙмағыҙ, үҙегеҙҙе һаҡлағыҙ.
Фәнил Гәрәев.