Аферистарҙың «ҡапҡанына» эләккәндәр

Аферистарҙың «ҡапҡанына» эләккәндәр

Районда инвестиция платформаларынан өҫтәмә хеҙмәт хаҡы алыу һылтауы менән мутлашыусылыҡ осраҡтары йышайҙы, шулай уҡ алдауҙың яңы схемалары барлыҡҡа килде. Был турала РФ Эске эштәр министрлығының Ҡырмыҫҡалы районы буйынса бүлек начальнигы урынбаҫары, эске хеҙмәт подполковнигы Динар Сәйфуллин һөйләне.

Аҡсаларын “инвестициялағандар”

Һарт-Науруз ауылынан бер ҡатын со­циаль селтәрҙә аҡса индермәйенсә аҡса эшләргә тәҡдим иткән рекламаны күреп ҡала. Ул һылтанма буйынса кереп, анке­та тултыра һәм үҙенең телефон номерын ҡалдыра. Уға “менеджер” шылтыратып, инвестициялау юлы менән аҡса эшләргә тәҡдим итә.

Мутлашыусы, зыян күреүсенең ыша­нысына инеп, уны 1 245 500 һум аҡса һа­лырға күндерә. Ҡатын инвестицияларҙа аҡса эшләргә теләп, кредит ала.

Подлуб ауылында йәшәүсе ҡатын телевизорҙан инвестицияларҙа аҡса эшләү тураһында рекламаны күрә һәм күрһәтелгән номер буйынса шылтыра­та. Ҡатын брокерлык компанияһының “менеджеры” биржа сайтында теркәлеү өсөн ебәрелгән һылтанма буйынса 2 800 һум күсерә. Мутлашыусыға һалынған аҡ­саларҙың проценты артыуына ышанып, зыян күреүсе тағы 8 000 һум аҡсаһын күсерә. Бер нисә көндән уның брокерлык иҫәбенә 1 802 һум күләмендә проценттар килә. Инвестиция компанияһының “ме­неджеры” тағы ла күберәк аҡса эшләп бу­ласаҡ, тип ышандыра.

Бер ни тиклем ваҡыттан һуң зыян күреүсегә ялған менеджер шылтырата һәм аҡсаны күсерер өсөн банк картаһы­ның номерын күрһәтеүҙе һорай. Уның кредит тарихы насар икәнен асыҡлағас, өсөнсө зат аша аҡса алырға тәҡдим итә. Ҡатын табышты иренең банк картаһына күсерергә ҡарар итә. Видео-шылтыратыу буйынса элемтәгә инеп, мутлашыусы уға нимә эшләргә кәрәклеген әйтеп тора. Ҡатын, үҙе лә аңламайынса, мутлашы­усыларға тормош иптәшенең банк кар­таһынан 725 000 һум аҡса күсерә.

Аферистар торлаҡ-коммуналь хужалығы өлкәһендә

Ефремкин ауылынан Алина С.-ҡа (исеме үҙгәртелде) таныш булмаған но­мерҙан шылтыраталар. Мутлашыусы үҙен инспектор тип таныштырып, электр щитында пломба булыу-булмауын тик­шереү өсөн ҡасан килһәм була, тип бе­лешә. Осрашырға һөйләшеп, аферист унан тикшереү системаһын сиратҡа ҡуйыуы тураһындағы кодлы смс килмә­неме, тип һорай. Алина С. телефонына килгән смс-кодты әйтеп бирә.

Һуңыраҡ Алина С.-ҡа 900 номерынан таныш булмаған кеше шылтыратып, үҙен “менеджер” тип таныштыра һәм мут­лашыусылар уның “Дәүләт хеҙмәттәре”н ватҡан хәҙер һиңә «Үҙәк Банк»тан шыл­тыратасаҡтар, тип киҫәтә.

Һуңғараҡ зыян күреүсе менән «Үҙәк Банк» хеҙмәткәре элемтәгә инә. Ул ҡор­банын бик оҫта алдап, алдан уйланған схема буйынса эш итә: яңы кредит алы­рға һәм уны “хәүефһеҙ” иҫәпкә һалырға ҡуша.

Зыян күреүсе мутлашыусының һиҙ­гер етәкселеге аҫтында бер нисә кредит рәсмиләштереп, кредит картаһынан аҡса ала һәм 475 000 һум аҡсаны күрһәтелгән иҫәпкә күсерә.

Миләүшә ШАМИЛЕВА.