Курьер аша алданған

Беҙҙең районда мутлашыусыларға бәйле тағы бер осраҡ теркәлгән. Был юлы Ҡабаҡ ауылында йәшәүсе ҡатын 300 мең һумға яҡын аҡсаһын юғалтҡан. Август аҙағында, компьютерҙа "паззлы" уйынын уйнап, 71 йәшлек ҡатын экранда Газпром акцияһының инвестициялары һәм һатып алыуҙары тураһында иғлан итеүгә иғтибар итә, һылтанма буйынса унда инә, үҙенең телефон номерын күрһәтә һәм шылтыратыуҙы көтә.
Мәскәү биржаһының ялған хеҙмәткәре еңел эш хаҡы тәҡдим итә, бының өсөн зыян күреүсе Хабенский фондына 15 мең һум аҡса күсерә. Артабан тиҙ аҡса эшләү вәғәҙәләре менән тағы ла төрлө тәҡдимдәр яуа башлай. Ҡатын микрозаймдар, картанан ҡулаҡса ала һәм аҡсаны Өфөләге курьерға тапшыра. Дөйөм алғанда ул 296 мең һум аҡсаһынан мәхрүм була.
Курьер ҡатынды ҡулға алалар. Ул 1960 йылда Өфөлә тыуған. Әйткәндәй, был 2,5 миллион һумдан ашыу суммаға мутлашыусыларҙан зыян күргән ҡатын булып сыҡҡан. Ярҙамы өсөн уға бөтә бурыстарын түләргә вәғәҙә итәләр.
Һуңғы йылдарҙа кеше хаҡына байырға теләгән мутлашыусылар бигерәк күбәйеп китте. Уяу булайыҡ, хәләл аҡсабыҙҙың бәрәкәтен күрәйек, яҡындарыбыҙҙы, ололарҙы мутлашыу ауынан аралайыҡ.
Фирүзә ЙӘМИНЕВА.