+23 °С
Ясно
Уяу булайыҡ
20 Апреля 2021, 04:03
Кисә Вязовка ауылында тағы янғын булды
Бәләкәй генә Вязовка ауылында әле ташҡын менән көрәшеп туҡтаһалар, кисәге янғын тағы ла ошо ауылға юлланырға мәжбүр итте. Янғын сығыуҙың төп сәбәбе – кешеләрҙең вайымһыҙлыҡ күрһәтеүе арҡаһында. Барыһы ла көн кеүек асыҡ – усаҡ, шашлыҡҡа әҙерләнгән, ләкин ҡыҙҙырып өлгөрмәгән ит – былар барыһы ла 15 гектар майҙанда ҡоро үләнгә ут тоҡаныуға килтерҙе. Утты бөтөрөүгә 8 берәмек техника һәм 12 янғын һүндереүсе йәлеп ителде. Булгак, Боҙаяҙ ауыл советтарының янғын һүндереү частары етеҙлек күрһәтте.
Һәр кем елле, ҡоро көндәрҙә ҡоро үләнгә ут тоҡанһа тиҙ янып китеүен яҡшы белә. Шуға ҡарамаҫтан, һаҡлыҡ күрһәтмәй. Былар ҙур бәләгә килтереүен аңларға тейешбеҙ.
Бер аҙна эсендә генә район биләмәһендә 6 янғын осрағы булды, уларҙың өсәүһе баҫыуҙарҙағы үләнгә ут тоҡаныу. Бынан тыш, Ҡырмыҫҡалы ауылында сүп-сар, мунса янды, Атйетәр ауылында шәхси ут янды.
Хөрмәтле район халҡы! Һеҙҙе һаҡ булырға саҡырабыҙ һәм хәүефһеҙлек ҡағиҙәләрен боҙған өсөн штрафтар барлығы хаҡында киҫәтәбеҙ.
