Мөһим проектты һайланылар

 Программа сиктәрендә Ҡырмыҫҡалы районында тор­мошҡа ашырыла торған проект­тар ауыл халҡының иң мөһим проблемаларын хәл итергә ярҙам итә.

Ҡамышлы ауыл Советы “Урындағы башланғыстарҙы хуплау” программаһында әүҙем ҡатнаша, уларҙың берҙәмлеге еңеүгә ярҙам итә.

- Беҙ йыл һайын “Урын­дағы башланғыстарҙы ху­плау” программаһында ҡат­нашабыҙ. Ауыл биләмәһендә йәшәүселәрҙең әүҙемлеге һәм битараф булмауы һөҙөмтәһендә беҙҙең проекттар еңеүсе булып таныла. Шулай итеп, был про­грамма сиктәрендә Ҡамыш­лы ауылының Мәктәп, Малай ауылының барлыҡ урамдарын­дағы юлдар ремонтланды, трактор һатып алдыҡ һәм Үрге Төкөн ауылы клубының түбәһе ремонтланды.

Программа көнүҙәк мәсьәләләрҙе хәл итеүҙә ярҙам булып тора, шуға күрә беҙ киләсәк­тә лә унда әүҙем ҡатнашабыҙ һәм ҡуйылған маҡсаттарға ирешәбеҙ, тип билдәләп үтте ауыл биләмәһе башлығы Илгиз Бикҡужин.

Был юлы Түбәнге Төкөн ауылы халҡы бәхетен һынап ҡарарға булды. Барлыҡ кәрәкле эштәрҙе башҡарҙылар: ха­лыҡ бер тауыштан 2025 йылда “Урындағы башланғыстарҙы хуплау” программаһында ҡат­нашырға ҡарар итте, ауылдың мәсет бинаһын ремонтлау, урамдарға яҡтыртҡыстар ҡуйыу, мәктәп бинаһының тәҙрә уйымдарын капиталь ремонтлау кеүек мөһим проблемалар бил­дәләнде.

Ошо көндәрҙә үткәрелгән йомғаҡлау йыйылышында ха­лыҡ бер тауыштан “Мәктәп бинаһының тәҙрә уйымдарын капиталь ремонтлау” проекты өсөн тауыш бирҙе.

Көн тәртибендәге мәсьәләләрҙең береһе инициатив төр­көм эшенә бағышланды. Ини­циатив төркөм – ул муниципаль берәмек хакимиәтенә проектты әҙерләргә һәм өлкә бюдже­тынан субсидиялар алыу өсөн конкурсҡа документтар әҙерләү ваҡытынан алып ремонт эштәре тамамланғанға тиклем барлыҡ стадияларҙа башҡарырға ярҙам итеүсе фекерҙәштәр командаһы.

Эш барышында инициа­тив төркөм ағзаларына бында йәшәүселәр, хакимиәт хеҙмәт­кәрҙәре, бизнес вәкилдәре, подрядсылар менән тығыҙ ара­лашыуға тура килә. Инициатив төркөм ағзалары үҙ бурыстарын һәм мөмкинлектәрен теүәл күҙ алдына килтерергә, проекттың асылын яҡшы аңларға һәм уның тураһында һөйләй белергә тей­еш. Шунан сығып инициатив төркөм составына эште ойо­штора һәм проектты ғәмәлгә ашырыуҙың барышы тураһын­да халыҡҡа мәғлүмәт бирә бе­леүсе әүҙем кешеләр: Эльвира Үтәкова, Рәмилә Намаҙғолова, Рита Дәүләтшина, Ғәзимә Юл­мөхәмәтова, Татьяна Хөсәйенова, Рәүиә Хәмитова инде. Улар хәлде объектив баһаларға һәм дөрөҫ ҡарар ҡабул итергә һәләтле, “Урындағы башланғы­старҙы хуплау” программаһын ғәмәлгә ашырыу тәжрибәһе бар. Уларҙың тәжрибәһе һәм бе­лемдәре һәр кем өсөн ҙур ярҙам буласаҡ.

Эльвира ҒИМРАНОВА.