Был программа ауыл биләмәләрендә күп эштәрҙе башҡарыуға ярҙам булып тора. Ҡарлыман ауыл Советы ауыл биләмәһенең Урал ауылы халҡы ла унда ҡатнашырға теләк белдерҙе. Тәғәйенләнгән ваҡытҡа ауыл тормошона битараф булмағандар Спирт заводы алдына йыйылды.
Ҡарлыман ауыл Советы ауыл биләмәһе башлығы Азат Әхмәтйәнов сараны асып, халыҡты сәләмләне һәм ентекле итеп программаның мөмкинлектәре һәм шарттары менән таныштырып үтте.
- Әлбиттә, проблемалар күп. Был проект мәсьәләләрҙе асыҡлап, уларҙы хәл итеүгә йүнәлтелгән. Программала ҡатнашып, талап ителгән сумманың күп өлөшөн республика бюджетынан алыу мөмкинлеге лә бар. Ләкин бөтә проекттар ҙа еңеү яулай алмай. Шунлыҡтан республика ҡаҙнаһынан аҡса алыу өсөн бында ҡатнашыуға етди ҡарарға кәрәк. Проблемаларҙы хәл итеүҙә һеҙҙең әүҙем булыуығыҙ мөһим, - тине Азат Марат улы.
Ауыл биләмәһе башлығының мәғлүмәтен тыңлағандан һуң, ауыл халҡы бер тауыштан программала ҡатнашыу өсөн тауыш бирҙе. Артабан улар байтаҡ мәсьәләләрҙе уртаға һалып һөйләште, кәңәшләште. Фекер белдереүселәр тарафынан урамдарҙы яҡтыртыу һәм балалар майҙансығын төҙөү кеүек тәҡдимдәр яңғыраны.
- Заманса спорт һәм балалар өсөн уйын майҙансығы төҙөлһә, балаларыбыҙ ваҡыттарын файҙалы һәм матур итеп уҙғара аласаҡ,- ти ата-әсәләр.
Уртаҡ фекергә килгәндән һуң халыҡ берҙәм тауыш менән тренажерлы спорт һәм балалар майҙансығы булдырыу проекты өсөн тауыш бирҙе. Еңеп сыҡҡан осраҡта халыҡтан аҡса йыйыу мәсьәләһе лә билдәләнде. Шулай итеп, дөйөм сумманың 3 процентын ауыл халҡы йыясаҡ. Проектты әҙерләү һәм уның үтәлешенә контроллек итеү өсөн ауыл активистары араһынан 5 кешенән торған инициатива төркөмө төҙөлдө. Был бурыстар Айгөл Дятленко, Нуридә Солтанморатова, Галина Грачева, Флүрә Макаева, Рима Дятленкоға йөкмәтелде.
Ураллылар аҡса артып ҡалған осраҡта урамдарҙы яҡтыртыуға ҡулланыуҙы килештеләр.
Район халҡы программала ҡатнашыуға, аҡса йыйыуға аңлы һәм яуаплы мөнәсәбәт күрһәтә. Халыҡтың әүҙем ҡатнашлығында ғына барлыҡ уй-ниәттәрҙе бойомға ашырырға мөмкин. Һәр ауыл проектарының конкурсты уңышлы үтеүен теләп ҡалабыҙ.
Фирүзә РӘХМӘТУЛЛИНА.
Автор фотоһы.