Икеләтә байрам булды

Тантана райондың имам-­­мөх­­тәсибе Ирек хәҙ­рәт Әбүталиповтың Ҡөрь­ән сүрәләрен уҡыуы менән башланды. Ха­лыҡтың шатлығын уртаҡ­лашырға район башлығы Әлфир Сабиров, Шайморатов ауылының имамы Әфҡәт Ниғмәтуллин, тирә-яҡтарҙа ғүмер итеү­се ауылдаштар, күрше ауыл­дар халҡы килде. Иҫ­тә­лекле ваҡиғала мәсет төҙөлөшөнөң төп иғә­нә­сеһе Нил Ғәлимйән улы Хәмитов ҡатнашты.
Ҡунаҡтар сығыш яһап, мә­сет­кә халыҡтың эҙе һыуынмаһын, манараһынан һәр ваҡыт аҙан тауышы ишетелеп торһон, тигән теләктәрен еткерҙе, ә изге күңелле Нил Ғәлимйән улына ҙур рәхмәт белдерҙеләр, уға Ҡөрьән китабы һәм Рәхмәт хаты тапшырҙылар.
- Мәсет – дөрөҫ итеп йәшәргә саҡырыусы из­ге урын. 2006 йылда Шайморатовта мәсет һал­дырҙым, аҙаҡ уға реконструкция эшләттем. Тыуған ауылымда ла мәсет төҙөтөү тынғылыҡ бирмәне, 2010 йылдарҙа ныҡлап уйлай башланым. Былтыр эш баш­ланғайны, бына теүәлләнде. Алла бирһә, мәсет манараһынан мө­ҡәд­дәс аҙан яңғырап торор, - тине Нил Хәмитов.
Тантаналы өлөштән һуң ауыл халҡы һәм ҡунаҡтар барлыҡ уңайлыҡ­та­ры булған изге йорт эсенә инеп, намаҙ уҡыны, ил-көндәрҙең тыныс­лығын һорап доға ҡылды. Артабан байрамға ки­леүселәр мул табын артынд­а һыйланды, ҡорбан ашынан ауыҙ итте.
Ҡорбан көндө мәсет асыу – ауыл халҡы һәм ҡунаҡтар өсөн ысын мәғәнәһендә ҙур байрам булды. Уның программаһы үҙенсәлекле ине. Был иҫтәлекле көндө мә­сет эргәһендә баш ҡаланан килгән билдәле артистар - Асия Смаҡова, Иҙрис Кәлимуллин, Са­лауат Әҡсәнов, Гүзәл Кәлимуллина, Илдар Ғә­линуровтар халыҡты икеләтә байрам менән тәбрикәләп, сығыш яһаны.
Нил Хәмитов бер ва­ҡытта ла үҙенең тыуған яғын онотмай, һәр саҡ ярҙам ҡулын һуҙып тора. Ле­гендар полководец Миң­­леғәле Шайморатов­тың тыуған Шаймора­тов ауылында ла ул мәсет төҙөткән була, ата-әсә­һе­нә бағышлап, уға “Ғәлим­йән һәм Ғәтиә” исеме биргән.
Бына хәҙер тыуған Вар­шавка ауылында уның тарафынан күркәм мәсет барлыҡҡа килде. Иман йорто шул тиклем күңел биреп эшләнелгән, уның тышы ла, эсе лә матур, яҡты, йылылыҡ бөркөлөп тора.
Тантана тамамланғас, ҡатнашыусылар күңелдәрендә тыуған хистәре менән уртаҡлашты.
- Ауылыбыҙ бөхтә, матур, уны мәсет тағы ла йәмлерәк итте. Заманса, бейек манаралы күркәм мәсет ауылға нур һәм йәм биреп, балҡып тора. Бында мәсет барлыҡҡа килеүенә ныҡ һөйөнәм. Дини байрам көндө нур өҫтөнә нур булды. Мәсетте минең класташым, балалыҡ һәм ғүмерлек дуҫым Нил Хәмитов төҙөүенә бик һөйөнәм. Ул иман нуры һибеп, кешеләрҙе дингә тартып торор, тип ышанам, - тип ауылдашы менән ғорурланыуын белдерҙе Ҡырмыҫҡалы ауылынан Венер Батталов.
Алыҫтан балҡып тор­ған мә­сет манараһы иман­ға, әхлаҡҡа маяҡ булып, ауылға ҡот һәм илаһи моң өҫтәһен!
Фәниә Сәлимгәрәева.
Автор фотолары.