ИСТИҒФАР ЕМЕШТӘРЕ

"ӘстәғфируЛлаһ" – ул "Аллаһтан ғәфү үтенәм", тигән һүҙҙәр. Һәм, был доғаны әйтеп, кеше Аллаһтан:

1) уның гонаһын йәшереүен һәм
2) гонаһы өсөн яза бирмәй, уны ғәфү итеүен үтенә.

Ә күп итеп истиғфар доғаһын әйтеүсе иһә ошо ниғмәттәргә өлгәшер, ин шәә Аллаһ:

1) Гонаһтары ғәфү ителер.

"Кем берәй яуызлыҡ эшләп йә үҙенә ҡарата золом күрһәтеп (гонаһ ҡылып), шунан һуң Аллаһтан ғәфү үтенә, шул Аллаһты Ғәфү итеүсе, Рәхимле итеп табыр" (Ҡөрьән, 4:110).

2) Гонаһтары өсөн тейеш булған яза ситкә алыныр.

"Улар Аллаһтың ғәфү итеүен үтенгәндә, Аллаһ уларҙы ғазапҡа тарттырмаҫ" (Ҡөрьән, 8:33).

3) Уға мул ризыҡ (байлыҡ) һәм ниғмәт бирелер.

"Раббығыҙҙан ғәфү үтенегеҙ һәм Уға тәүбә килтерегеҙ — шунан Ул һеҙҙе билдәле ваҡытҡа тиклем иң яҡшы ниғмәттәр менән бүләкләр һәм һәр яҡшылыҡ эйәһенә Үҙенең йомартлығын күрһәтер" (Ҡөрьән, 11:3).

4) Раббыбыҙҙың һөйөүенә лайыҡ булыр.

"Ысынында, Аллаһ тәүбә итеүселәрҙе ярата һәм таҙарыныусыларҙы ярата" (Ҡөрьән, 2:222).

5) Уға һәр ҡатмарлы хәлдән сығыу юлы бирелер.

Быға дәлил — Ибн Ғәббәс исемле сәхәбәнең әҫәрендә:

"Кем һәр ваҡыт истиғфар ҡыла, шуға Аллаһ һәр ҡатмарлы хәлдән — ҡотолоу һәм һәр бәләнән сығыу юлы бирер һәм уны Ул һис көтмәгән ерҙән ризыҡландырыр".

Әбү Дауыт йыйынтығынан.

6) Уға көс өҫтәлер.

"Эй халҡым, Раббығыҙҙан ғәфү һорағыҙ, шунан Уға тәүбә килтерегеҙ — һеҙгә Ул күктәрҙән мул ямғырҙар ебәрер һәм һеҙҙең көсөгөҙгә тағы көс өҫтәр. Минең дәғүәтемдән гонаһҡарҙар булып боролмағыҙ!" (Ҡөрьән, 11:52).

7) Доғаларына яуап булыр.

"Унан (Аллаһтан) ғәфү итеүен һорағыҙ, шунан Уға тәүбә килтерегеҙ. Ысынында, Раббым — Яҡын, доғаларға яуап бирә" (Ҡөрьән, 11:61).

ӘстәғфируЛлаһ

Мөслимә яҙмалары