«Тыуған илде һаҡлау олатайҙарыбыҙҙан ҡалған»

«Тыуған илде һаҡлау олатайҙарыбыҙҙан ҡалған»

Егет мәктәпте тамамлау менән армия сафына алына. Мәскәү өлкәһендә артил­лерист булып өлгөлө хеҙмәт итә. Ауыл ерендә тәрбиәләнгән егет эшһөйәр, фи­зик һәм рухи яҡтан сәләмәт, спорт менән дуҫ булып үҫә. Шуға армия хеҙмәтендә лә һынатмай. Артабан уны кесе коман­дирҙар составында уҡыталар. Һалдат ан­тына тоғро ҡалып, намыҫлы хеҙмәт иткә­не өсөн ата-әсәһе Рәхмәт хаттары алып ҡыуана. Хәрби тормошто үҙ иткән егет хеҙмәт итеп бөтмәҫ элек контракт төҙөп үҙен армияға бағышларға ҡарар итә. Атаһы менән әсәһе фатихаларын биреп, ризалашалар. “Прапорщиктар мәктә­бе”н тамамлап, хәрби звание ала. Хеҙмәт итеү осоронда уға ике тапҡыр Сүриәлә лә командировкаларҙа булырға тура килә.

Махсус хәрби операция башланып киткәс, ул хеҙмәтен ҡыҙыу нөктәлә дауам итә. Бында техник-механик һөнәрен ала. Әлеге ваҡытта тәьминәт итеү взводы ко­мандиры – улар алғы һыҙыҡты боепри­пастар, аҙыҡ-түлек, кейем-һалым менән тәьмин итеп торалар.

Яҡташыбыҙ яҡшы хеҙмәте, хәрби бурысты намыҫлы үтәгәне өсөн Рәсәй Федерацияһы Оборона министрлығы тарафынан билдәләнә. «Ҡаһарманлыҡ өсөн», Жуков, II дәрәжә «Ҡаһарманлыҡ өсөн», «Махсус хәрби операцияла ҡатна­шыусыға», «Сүриәлә хәрби операцияла ҡатнашыусыға», «Авдеевканы азат иткән өсөн» миҙалдарына лайыҡ була. Шулай уҡ һалдаттарҙың ата-әсәләренән рәхмәт хаттарын да алып тора икән.

Яугирҙән ни өсөн хәрби юлдан китеүе тураһында һорашам. “Армияға тиклем янғын һүндереүсе булғым килде. Хеҙмәт итеү барышында теләгем үҙгәрҙе. Ғүме­ремде хәрби тормошҡа бағышларға уй­ланым. Быға һис тә үкенмәйем. Хеҙмәт итергә, илебеҙҙе һаҡларға кәрәк. Тыуған илде һаҡлау электән ата-бабаларыбыҙҙан ҡалған. Дәүләтбай олатайым да Бөйөк Ватан һуғышында ҡатнаша. Ул киләһе быуын тыныслыҡта, азатлыҡта йәшәһен өсөн дошманға ҡаршы аяуһыҙ көрәшә. Ҡыҙғанысҡа, ҡаты яуҙарҙың береһендә бер аяҡһыҙ һәм бер ҡулһыҙ ҡала... Ты­уған илде яҡлау – һәр ир-егеттең бурысы. Илебеҙҙә һуғыш булмаһын, балаларыбыҙ тыныслыҡта йәшәһен өсөн көрәшәбеҙ. Еңеү беҙҙең яҡта булырына ышанам”, - тип һөйләне яугир.

“Шихан” донъялар тынысланып, хәрби хеҙмәте тамамланып, пенси­яға сыҡҡас, тыныс тормошта улын һәм ҡыҙын аяҡҡа баҫтырырға теләй.

- Улыбыҙ һәр саҡ кешелекле, ярҙам­сыл, изге күңелле булды. Ҡайҙа ғына хеҙмәт итһә лә, хәлдәребеҙҙе һорашып, сәләмдәрен еткереп тора. Беҙҙе борсол­дормайым тип һәр ваҡыт яҡшы тип яуап бирә. Ялға ҡайтҡанында ла йылы һүҙҙәре менән күңелде йомшарта, беҙгә тик из­гелектәр генә эшләргә тырыша. Уның иҫән-һау йөрөүен теләп, доғаларымды уҡып ҡына торам, - ти әсәһе.

Донъялар тынысланып, уй-ниәттәре­нең тормошҡа ашыуын, барлыҡ хәр­биҙәрҙең иҫән-имен ҡайтыуҙарын теләй­беҙ.

Әйткәндәй, республикала контракт төҙөгәндәргә бер тапҡыр бирелә торған түләү 2 миллион һумға тиклем артты­рылды.

Хеҙмәт итеү йылында 4 520 000 һум аҡса эшләргә мөмкин. Махсус хәрби опера­цияла ҡатнашыусылар һәм уларҙың ғаилә ағзалары өсөн республикала шулай уҡ 40- тан ашыу льгота ғәмәлдә: фатирҙарға ташламалар, шифаханаларға путевка­лар, балалар өсөн бушлай белем биреү һәм башҡалар.

Контракт хеҙмәтенә ҡағылышлы һорауҙар буйынса 2-14-78, 2-11-58 теле­фондары буйынса шылтыратырға йәиһә Ҡырмыҫҡалы һәм Архангел райондарының хәрби комиссариатына килергә мөмкин.

Фәниә СӘЛИМГӘРӘЕВА.