Уны дуҫтары “Мудрый” тип йөрөтә

“Мудрый” позывнойын йөрөтөүсе яҡташыбыҙ ҙа күп уйлап тормайынса, Рәсәй Федерацияһының Оборона министрлығы менән контракт төҙөп, махсус хәрби опе­рация биләмәһенә барырға ниәт итә.

Яҡтыкүл ауылында тыуып үҫкән рай­ондашыбыҙ урындағы мәктәпте тамам­лап, Стәрлетамаҡ ҡалаһында физик куль­тура уҡытыусыһына уҡый. Дипломлы белгес үҙенең хеҙмәт юлын Подлуб ауылы мәктәбендә башлай.

Яҡташыбыҙ әрме хеҙмәтенә алынғас, Афғанстан сигендә Ватан алдындағы бу­рысын үтәй. 1995 йылда ул Рәсәй Федера­цияһының Оборона министрлығы менән тәүге контрактын төҙөп, Чечен Республи­каһында хеҙмәт итә. Артабан ул тыуған яҡтарына әйләнеп ҡайта, республикабыҙ предприятиеларында эшләй. Тормош иптәше менән бер ул үҫтерәләр.

2022 йылда икенсе тапҡыр Рәсәй Федерацияһының Оборона министр­лығы менән контракт төҙөп, “Мудрый” үҙ теләге менән махсус хәрби операция биләмәһенә юллана. Ватан алдындағы бурысын үтәгән саҡта күрһәткән ҡаһар­манлығы өсөн ул Суворов, “МХО-ла ҡат­нашыусы” миҙалдарына һәм башҡа наградаларға эйә була.

Тыуған төйәгенә һанаулы ғына көн­дәргә ялға ҡайтҡан яугир менән беҙгә те­лефон аша аралашырға насип булды.

- Тыуған илемде яратам, шуға күрә минең алда “Махсус хәрби операцияға ба­рырғамы, юҡмы?” тигән һорау торманы. Минең тәжрибәм илде һаҡлау өсөн кәрәк, тип иҫәпләйем. Тәүҙә Шайморатов ба­тальонында хеҙмәт иткәйнем, һуңынан Даян Мурзин исемендәге батальонға күстем. Бына әле район үҙәгенә барып, ирекмән райондаштарым әҙерләгән гума­нитар ярҙамды алып китеү эштәре буйын­са мәсьәләләрҙе хәл иттем. Резеда Әхтә­мова етәкләгән ирекмәндәр командаһына оло рәхмәт әйткем килә. Улар үҙҙәренең ваҡытын йәлләмәйенсә яугирҙәр өсөн ҙур ярҙам күрһәтәләр. Беҙгә даими рәүештә гуманитар ярҙам килеп тора. Шундай ҙур эш башҡарғандары өсөн яҡташтарым­дың барыһына ла оло рәхмәтлемен. Хәр­би хеҙмәткәрҙәр өсөн тылдан ярҙам бик мөһим. Ул яугирҙәрҙең рухын күтәрә һәм көс өҫтәй. Беҙҙең хәлде белешеп торға­нығыҙ өсөн һеҙгә лә рәхмәт. Яҡташта­рымды етеп килгән Яңы йыл менән ҡот­лайым. Яңы йылда беҙҙең ир-егеттәр еңеү менән тыуған яҡтарына әйләнеп ҡайтһындар, тип теләйем, - тине ул.

Беҙ ҙә, үҙ сиратыбыҙҙа, барлыҡ яу­гирҙәргә хәйерле, изге, имен юлдар теләй­беҙ! Иҫән-һау әйләнеп ҡайтығыҙ, ҡыйыу ир-егеттәр!

Әйткәндәй, республика халҡы махсус хәрби операция зонаһында хеҙмәт итеү өсөн РФ Оборона министрлығы менән кон­тракт төҙөһә, бер тапҡыр 505 мең һум аҡса аласаҡ. РФ Оборона министрлығы түләүҙәре (400 мең һум) һәм райондан (100 мең һум) контракт төҙөгәндә түләүҙәр 1 миллион һумға артты.

Контракт хеҙмәтенә бәйле һорауҙар буйынса 2-14-78, 2-11-58 телефондары буйынса шылтырата йәки Ҡырмыҫҡалы һәм Архангел райондары буйынса хәрби ко­миссариатҡа килергә мөмкин.