Ҡартатаһы юлын дауам итеп...

1982 йылдың 22 сентябрендә Миңлеәсмә һәм Вячеслав Әхмәто­втарҙың ғаиләһендә өс ҡыҙҙан һуң көтөп алған малай булып тыуа Маратыбыҙ. Шәрипҡол мәктәбен тамамлағандан һуң Ватан алдындағы бурысын үтәр өсөн ар­мия сафтарында хеҙмәт итеп ҡайтты. Ма­рат үҙенең тәртипле, ярҙамсыл булыуы менән барыбыҙҙы ла һоҡландырҙы. Ул ҡайҙа ғына эшләһә лә, һәр ваҡыт эшен еренә еткереп башҡарҙы, һәр нәмәгә яу­аплы ҡараны. Туғандары, дуҫтары һәм башҡа кешеләр менән һәр саҡ матур итеп аралаша белә ине. Уның кемгәлер асыу­ланып йөрөгәнен бер ҡасан да күрмәнек.

Ошо йылдың март айында, Рәсәй Оборона министрлығы менән контракт төҙөп, туғаныбыҙ үҙ теләге менән махсус хәрби операция биләмәһенә юлланды.

Әйткәндәй, Мараттың ҡартатаһы Хәйрулла Нурғәли улы Әхмәтов Бөйөк Ватан һуғышы йылдарында данлыҡлы яҡташыбыҙ Миңлеғәле Шайморатов етәкләгән 112-се кавалерия дивизияһы­ның 294-се полкында комиссар була. Яуҙа күрһәткән батырлыҡтары өсөн ул Ҡыҙыл Йондоҙ, 1-се дәрәжә Ватан һуғышы, Ҡыҙыл Байраҡ ордендары менән бүләкләнә.

Бына инде, бер быуатҡа яҡын ваҡыт үткәс, Марат туғаныбыҙ ҙа ҡартатаһы юлын дауам итеп, үҙ ирке менән Тыуған илебеҙҙе һаҡларға ҡарар итте һәм ҡасан­дыр ҡартатаһы йөрөгән ерҙәрҙә уның эҙҙәрен үтте. Бына ошо булалыр инде быуындар бәйләнеше.

Уйлап ҡараһаң, махсус хәрби опера­ция биләмәһендәге һәр яугир ата-баба­ларының юлын ҡабатлай һәм илебеҙгә яу килгәндә ситтә ҡалмай.

Маратыбыҙ ҙа Ҡаһарманлыҡ ордены менән бүләкләнде, тик үкенескә ҡаршы, һәләк булғандан һуң. 12 октябрҙә Ҡу­стығол ауылында беҙ яратҡан туғаныбыҙ Марат Әхмәтовты һуңғы юлға оҙаттыҡ.

Әлеге көндә бихисап яҡташтарыбыҙ һуғыш яланында һәм әле лә ул саҡтағы һымаҡ башҡорт подразделениелары үҙҙәрен иң яуаплы, иң батырҙарының бе­реһе итеп күрһәтеүгә өлгәшә. Яугирҙәре­беҙҙең барыһы ла тиҙ арала еңеү менән тыуған төйәктәренә әйләнеп ҡайтыуҙа­рын ысын күңелдән теләп ҡалабыҙ!

Флүрә САМИҠОВА.

Олокүл ауылы.