Депутаттарҙың машинаһына дрон һөжүм иткән

Башҡортостан – Дәүләт Йыйылышы Ҡоролтай депутаттары Тимерғәли Ураҙғолов менән Юлиә Краснова китеп барған автомобиль махсус хәрби операция биләмәһендә дрондар һөжүме аҫтында ҡалған. Депутаттар гуманитар йөк тапшырып ҡайтып килгән булған.

Парламент Рәйесе Константин Толкачев һөйләүенсә, улар Тимерғәли Ураҙғоловтың шәхси автомобилендә яугирҙәр менән осрашып, уларға гуманитар йөк тапшырып ҡайтып килгән.

– Запорожье өлкәһендә Токмак ауылы янында автомобилгә дрондар һөжүм иткән, – тип һөйләне Константин Толкачев. – Машина тиҙ китеп барған, дрон уның ҡыйығына бәрелгән һәм осоп китеп, һауала шартлаған. Коллегаларыбыҙ бәхетенә, төп һөжүмде үҙ өҫтөнә машина алған. Автомобиль ныҡ ҡына зыян күргән, ләкин йөрөгән, депутаттар уның менән хәүефле зонанан үҙаллы сыға алған.

Тимерғәли Ураҙғолов ярсыҡ менән еңелсә яраланған, дауаханаға ятыуҙан баш тартҡан.

Әле депутаттар Ростов өлкәһендә һәм Өфөгә ҡайтып киләләр.