Хәрби бурысын лайыҡлы үтәй
Ватан тигәндә беҙ Тыуған илебеҙҙе генә түгел, ә шулай уҡ ата-әсәләребеҙҙе, ғаиләбеҙҙе күҙ уңында тотабыҙ. Ватанды һаҡлаусылар байрамы көслө рухлылыҡ, батырлыҡ, илһөйәрлек, намыҫ кеүек сифаттарҙы үҙ эсенә туплаған. Илебеҙҙә барған һуңғы ваҡиғалар солғанышында был байрамдың мәғәнәһе тағы ла киңерәк даирәгә эйә булды һәм беҙҙе тағы ла тәрәнерәк тойғолар кисеререргә мәжбүр итте.
Эйе, йәштәргә рух, илһөйәрлек өлгөһө үтә лә кәрәк заманда йәшәйбеҙ. Күп кенә яҡташтарыбыҙ Ватаныбыҙ тыныслығы хаҡына ил һағына баҫты, йәш егеттәребеҙ әрме хеҙмәтендә хәрби бурыстарын үтәй. Байрам алдынан әлеге көндә Рәсәй армияһында хеҙмәт итеүсе яҡташтарыбыҙҙың береһе менән таныштырып үтмәксебеҙ.
Ҡырмыҫҡалы егете Радмир Рәхимов Октябрьский ҡалаһындағы нефть техникумын тамамлай. Район үҙәгендә бер аҙ ғына эшләп алырға өлгөргән йәш егеткә хәрби комиссариаттан повестка ла килеп төшә. Бала саҡтан спорт менән дуҫ булған, бер нисә йыл буйына хоккей командаһында шөғөлләнгән Радмир күптән инде хәрби хеҙмәткә әҙер була.
-Сәләмәт тормошҡа һәм спортҡа һөйөү, физик яҡтан әҙерлекле булыу хәрби хеҙмәттә ҙур ярҙам итә, -ти ул был турала.
Радмир Айрат улы Әстрәхән өлкәһе Знаменск ҡалаһында Стратегик тәғәйенләнештәге ракета ғәскәрҙәрендә хеҙмәт итә. Бары тик дүрт ай ғына хеҙмәт итеүенә ҡарамаҫтан, ул хеҙмәттәштәре алдында үҙен тик яҡшы яҡтан ғына күрһәтергә өлгөргән.
-Дуҫтарым – Ҡырмыҫҡалы егеттәре Вадим һәм Илназ Халиҡовтар менән бер ваҡытта хеҙмәткә алындыҡ һәм улар менән бер ергә эләктек. Быға барыбыҙ ҙа ҡыуанып бөтә алмайбыҙ. Вадим менән гел бергәбеҙ, хатта, бер частә хеҙмәт итәбеҙ. Илназ икенсе часкә эләкһә лә, уның менән дә йыш ҡына күрешеп торабыҙ. Сит ерҙә яҡташтарыңды осратыу – үҙе ҙур бәхет. Ә инде дуҫтарың менән бергә хеҙмәт итеү икеләтә ҡыуаныслы, -тигән сәләмдәрен ебәрҙе беҙгә Радмир.
Радмир һәм уның дуҫтары ил алдындағы изге бурыстарын лайыҡлы һәм намыҫлы үтәп, тыуған яғында түҙемһеҙлек менән көтөүселәрҙең өмөттәрен аҡларҙар тигән ышаныста ҡалабыҙ.