«Хәрби булыу миңә оҡшай»
Махсус хәрби операция башланыу менән контракт хеҙмәтендә булған яҡташтарыбыҙҙың күбеһенә хеҙмәттәрен яу ҡырында дауам итергә тура килде. Улар араһында Ҡырмыҫҡалы ауылынан “Башкир” ҡушаматлы яугир ҙә бар.
Ҡырмыҫҡалының 1-семәктәбен яҡшы билдәләргә генә тамамлаған егет, Өфө дәүләт авиация техник университетына уҡырға инә. Юғары белемгә эйә булғас, шунда уҡ хәрби бурысын үтәр өсөн әрме сафына юллана. Хеҙмәтен тамамлап ҡайтҡандан һуң, бер йыл үткәс, Рәсәй армияһы менән хәрби контракт төҙөп, йәнә һалдат итеген кейергә ҡарар итә. Хеҙмәт иткән осорҙа яҡташыбыҙ Абхазияла барған ҡораллы бәрелештәрҙә ҡатнашырға ла өлгөрә. Махсус хәрби операцияның тәүге көндәренән алып ул яу яланында.
“Ни өсөн хәрби булырға ҡарар иттең?” – тигән һорау бирҙем ҡыҫҡа ваҡытлы ялға ҡайтҡан яугиргә.
- Бала саҡтан хәрбиҙәргә ҡыҙыҡһынып ҡарай торғайным. Үҙем әрме сафында булып ҡайтҡас, хәрби хеҙмәт тағы ла нығыраҡ ҡыҙыҡһындыра башланы һәм мин күп тә уйлап тормай, теләгемде тормошҡа ашырҙым. Хәрби булыу миңә ныҡ оҡшай һәм ошо юлдан киткәнемә бер ҙә генә үкенмәйем, - тип яуап бирҙе ул.
Махсус хәрби операцияла күрһәткән ҡаһарманлығы өсөн яҡташыбыҙ Суворов һәм Жуков миҙалдары менән бүләкләнгән.
Ҡыйыу йөрәкле “Башкир”ға артабан да шулай уңышлы хеҙмәт итеүен теләйбеҙ.