Ҡабаҡ ауылы лицейында был көндәрҙә эш ҡайнай. Бында уҡытыусылар Махсус хәрби операцияла ҡатнашыусыларға Яңы йылға витаминлы күстәнәс әҙерләй. Улар башҡорт халҡының борон-борондан киң таралған һәм бөгөнгө көнгә тиклем һаҡланып килгән - ҡаҡ ҡойоу эшен йәйеп ебәргәндәр.
- Ҡаҡ ҡойоу – бер генә көндә эшләнә торған эш түгел. Шуға күрә эшебеҙ аҙнаға һуҙылды. Шулай уҡ был ризыҡ тиҙ боҙолоп бармай. Алма ҡағында яугирҙәребеҙгә кәрәкле барлыҡ витаминдар тупланған. Улар ҡышҡы һыуыҡтарға бирешмәҫ. Тыуған илебеҙ өсөн яуҙа ҡатнашҡан яугирҙәргә витаминлы күстәнәсебеҙ тик файҙаға ғына булһын! Беҙҙе 100 кг алма менән тәьмин итеүсе эшҡыуарҙар – Олеся Әминеваға һәм Сарабек Абдуллоевҡа оло рәхмәтлебеҙ, - тиҙәр уҡытыусылар бер тауыштан.
Афарин, Ҡабаҡ лицейы коллективы!